Ordu.az xəbər verir ki, müqavilə “Dark Eagle” sisteminin ən kritik komponentlərindən olan Birgə Hipersəs Planerləmə Aparatı (C-HGB) və termal qoruma qalxanının istehsalını əhatə edir.
Bu addım ABŞ-nin hipersəs silah proqramının sınaq mərhələsindən operativ istifadəyə keçidində mühüm hədd kimi qiymətləndirilir.
“Dark Eagle” ABŞ ordusunun uzaqmənzilli hipersəs silah sistemi kimi hazırlanır.
Sistem ABŞ Hərbi Dəniz Qüvvələrinin “Conventional Prompt Strike” proqramı ilə birgə hazırlanmış C-HGB planerləmə aparatından istifadə edir.
Bu ortaq arxitektura sayəsində “Leidos”un həyata keçirəcəyi istehsal fəaliyyəti yalnız “Dark Eagle” üçün deyil, həmçinin ABŞ Hərbi Dəniz Qüvvələrinin gələcək hipersəs silah sistemləri üçün də kritik əhəmiyyət daşıyır.
“Dark Eagle”ın təxminən 2 min 775 kilometr mənzilə malik olduğu və “Mach 5”dən xeyli yüksək sürətlə fəaliyyət göstərə bildiyi bildirilir.
Hipersəs planerləmə aparatı raket mühərrikindən ayrıldıqdan sonra atmosfer daxilində manevr edərək hədəfə yönəlir. Bu uçuş profili sistemin klassik ballistik raketlərlə müqayisədə daha çətin aşkar olunmasına və qarşısının alınmasına imkan yaradır.
Bir “Dark Eagle” batareyası dörd daşıyıcı-buraxıcı maşından, hər maşında iki raketdən, bir Batareya Əməliyyat Mərkəzindən və bir dəstək vasitəsindən ibarətdir.
Beləliklə, bir batareya ümumilikdə səkkiz hipersəs raketi daşıya bilir.
ABŞ ordusu “Dark Eagle”dan istifadə edəcək ilk birlik olan “Bravo” batareyasını 2025-ci ilin dekabr ayında aktiv vəziyyətə gətirib.
Sözügedən birlik 3-cü Çoxsahəli Tapşırıq Qüvvəsinin tərkibində fəaliyyət göstərir və xüsusilə Hind-Sakit okean bölgəsinə yönəlmiş əməliyyat planlaşdırılmasında mühüm rol oynayır.
Hipersəs uçuş zamanı sistem üzərində temperatur təxminən 1650 selsi dərəcəsinə qədər yüksələ bilir.
Bu səbəbdən müqavilə çərçivəsində istehsal olunacaq termal qoruma qalxanı idarəetmə sistemlərini, döyüş başlığını və struktur komponentlərini həddindən artıq istidən qoruyacaq.
Bu texnologiya hipersəs silahlarının seriyalı istehsalında ən çətin mühəndislik istiqamətlərindən biri hesab olunur.
Proqram çərçivəsində 2022 və 2023-cü illərdə müxtəlif sınaq problemləri yaşansa da, 2024-cü ildə həyata keçirilən iki uğurlu uçuş sınağı proqramın yenidən sürət qazanmasına imkan verib.
2026-cı il martın keçirilən son sınaq da istehsal mərhələsinə keçid baxımından kritik məlumatlar təqdim edib.
ABŞ-nin “Dark Eagle” proqramı Çinin DF-17 və Rusiyanın “Avanqard”, “Kinzhal” və “Zirkon” sistemlərinə qarşı davam edən hipersəs silah rəqabətinin mühüm hissəsi hesab olunur.
Vaşinqton bu sistemləri xüsusilə yüksək dəyərə malik və güclü qorunan hədəflərə qarşı sürətli konvensional zərbə imkanı yaratmaq məqsədilə inkişaf etdirir.
Sevinc Əliyeva
Ordu.az
