Ordu.az xəbər verir ki, yeni tədbirlər həm xammalı, həm də döyüş təyyarələrinin istehsalı üçün vacib olan hazır məhsulları əhatə edir.

Sanksiya siyahısının genişləndirilməsinin səbəbləri və Rusiya aviasiya sənayesinin idxal olunan xammaldan texniki asılılığı barədə Ukrayna Prezidentinin Sanksiya Siyasəti üzrə nümayəndəsi Vladislav Vlasuk “Militarnyi”yə açıqlama verib.

Bu məhsulların siyahıya daxil edilməsi Ukrayna tərəfinin əvvəlki məhdudiyyətlərdəki boşluqları üzə çıxaran analitik fəaliyyətinin nəticəsi olub. Ukrayna tərəfdaşlarına sübut edib ki, kauçuk tədarükü təyyarələrin döyüş hazırlığına birbaşa təsir göstərir.

Rusiya yüksək yüklənməyə davamlı aviasiya şinləri üçün əvəzolunmaz komponent olan təbii kauçukun idxalından ciddi şəkildə asılı olaraq qalır. Uzun müddət bu sektor sanksiya rejimindən qismən kənarda qalmış və bu da təcavüzkarın hərbi-sənaye kompleksinin fəaliyyətini davam etdirməsinə imkan vermişdi.

2024-cü il ərzində Rusiya Federasiyası Avropa İttifaqı ölkələrindən 5,8 milyon dollardan çox dəyərində kauçuk almağa davam edib. Bu idxalın yarıdan çoxu xammaldan ibarət olub.

Avropa məhsullarını alan şirkətlər arasında “Ikon Tyres” və “Yanino Logistics Park” da olub. “Ikon Tyres” Finlandiyanın “Nokian Tires” şirkətinin 2023-cü ilin mart ayında “Tatneft”in nəzarətinə keçən keçmiş bölməsidir.

İdxal həmçinin Rusiya müdafiə sektoru ilə birbaşa əlaqələri olan “Cordiant” şin istehsalçısı tərəfindən də həyata keçirilib. Şirkət məhsulları Rusiya Müdafiə Nazirliyi adından tədarük edir.

Xüsusi problem isə formal olaraq artıq Avropa İttifaqının sanksiyalarına məruz qalan sintetik kauçuk idi. Lakin 2024-cü ildə bu material üçüncü ölkələr vasitəsilə Rusiyaya daxil olmağa davam edib və bu, mövcud sanksiya mexanizmində sistemli boşluqları üzə çıxarıb.

Sanksiyalardan yayınma halları ixrac nəzarətinin əhəmiyyətli dərəcədə gücləndirilməsinə ehtiyac olduğunu göstərib.

Rusiya sənayesi təbii kauçukun 80 faizədək hissəsini sintetik alternativlərlə əvəz etmək planları vasitəsilə asılılığı azaltmağa çalışıb. Lakin sənaye ekspertləri təbii materialın unikal fiziki xüsusiyyətlərinə görə idxaldan tam imtinanın mümkün olmadığını etiraf edirlər.

Xatırladaq ki, Tayvanın CNA nəşri Ukraynanın İqtisadi Təhlükəsizlik Şurasının (ESCU) Rusiyanın Çin istehsalı aviasiya şinlərindən kritik asılılığı ilə bağlı məlumatlarını yayıb.

Məlumata görə, 2024-cü ildə Çindən şin və material idxalı 60 milyon dolları ötüb.

Sevinc Əliyeva
Ordu.az