Ordu.az xəbər verir ki, Kim Çen In bu açıqlamaları Çin Prezidenti Si Cinpinin Pxenyana gözlənilən səfəri ərəfəsində edib.
Son günlər nüvə obyektlərinə, döyüş gəmilərinə və raket istehsalı müəssisələrinə baş çəkən Şimali Koreya lideri həm raket istehsal gücünün, həm də nüvə arsenalının artırılması barədə tapşırıqlar verib.
Kim Çen In ölkənin əsas sursat istehsalı müəssisələrindən birinə səfər edərək 2026-cı ilin ilk yarısında strateji silahların istehsal vəziyyəti ilə tanış olub.
Səfər zamanı Baş Raket İdarəsinin hazırladığı ballistik və qanadlı raketlərin istehsal imkanlarının genişləndirilməsinə dair uzunmüddətli planlar ona təqdim olunub.
Kim Çen In bildirib ki, Koreya Xalq Ordusunun yenidən strukturlaşdırılması və yeni əməliyyat bölmələrinin yaradılması raketlərə tələbatı kəskin artıracaq.
Bu səbəbdən o, mövcud istehsal imkanlarının növbəti beş il ərzində 2,5 dəfə artırılması barədə göstəriş verib. Şimali Koreya lideri planın baxılması üçün ümumi iclasın gündəliyinə çıxarılmasını da tələb edib.
Səfər zamanı yayılan görüntülər beynəlxalq müdafiə dairələrinin də diqqətini cəlb edib. Dövlət mediasının paylaşdığı fotolarda onlarla “Hwasong-11” qısamənzilli ballistik raketinin istehsal mərhələsində olduğu müşahidə olunub.
Beləliklə, Şimali Koreyanın taktiki ballistik raket ailəsinin əsasını təşkil edən Hwasong-11 istehsal xətti uzun fasilədən sonra ilk dəfə bu qədər aydın şəkildə nümayiş etdirilib.
Qərb analitik mərkəzlərinin KN-23 və KN-24 variantlarını da daxil etdiyi Hwasong-11 ailəsi son illərdə Şimali Koreyanın ən çox istehsal etdiyi ballistik raket sistemlərindən biri hesab olunur.
Məlumata görə, bu raket ailəsinin Rusiya tərəfindən Ukraynaya qarşı hücumlarda istifadə edildiyinə dair çoxsaylı hesabatlar dərc olunub. Kim Çen In son günlər yalnız raket zavodlarına deyil, digər strateji obyektlərə də baş çəkib.
O, həftə ərzində yeni uran zənginləşdirmə müəssisəsini ziyarət edərək nüvə arsenalının dəfələrlə artırılması barədə göstəriş verib. Bundan əlavə, nüvə silahı daşımaq qabiliyyətinə malik olduğu bildirilən 5 min tonluq Kang Kon esminesində də yoxlamalar aparıb.
Sevinc Əliyeva
Ordu.az
