Ordu.az xəbər verir ki, bu barədə “European Pravda” məlumat yayıb.
Bu məqsədlə Avropa Komissiyası alyansın təsisçi üzvləri olmaq üçün maraq ifadələrinin qəbuluna başladığını elan edib.
Alyansın məqsədi müdafiə təyinatlı pilotsuz uçuş aparatları və onlara qarşı əks-tədbirlər üçün innovativ sənaye ekosisteminin yaradılması vasitəsilə Avropa İttifaqı və Ukraynanın təhlükəsizlik və müdafiəsini gücləndirməkdir. Maraqlı tərəflərdən müraciətlər 2026-cı il mayın 25-dək qəbul ediləcək.
Avropa Komissiyası bildirib ki, təşəbbüs pilotsuz uçuş aparatlarının istifadəsindən qaynaqlanan artan təhdidlərdən qorunma ehtiyacına əsaslanır.
Sənaye ekosistemi kimi alyans Müdafiə Hazırlığı Yol Xəritəsi 2030 və Komissiyanın pilotsuz uçuş aparatlarının təhlükəsizliyi və onlara qarşı əks-tədbirlər üzrə fəaliyyət planı əsasında pilotsuz uçuş aparatları və əks-tədbirlər sahəsində kompleks qabiliyyətlərin formalaşdırılmasına töhfə verəcək.
Təsisçilər Avropa İttifaqı və Ukraynanın müdafiə təyinatlı pilotsuz uçuş aparatı ekosistemlərində təsdiqlənmiş təcrübəyə malik müraciətçilər arasından seçiləcək.
Onlar təşkilatın prioritetlərini və fəaliyyət istiqamətlərini müəyyən edəcək alyansın ilk idarə heyətini formalaşdıracaqlar. Alyansın yaxın aylarda fəaliyyətə başlaması gözlənilir.
Ukraynanın Avropa İttifaqı ilə əməkdaşlığı
Bu yaxınlarda Avropa Komissiyası Ukrayna ilə tərəfdaşlıq çərçivəsində müasir silahların hazırlanması və istehsalını sürətləndirmək məqsədilə “BraveTech EU” layihəsini işə salıb.
Proqram Avropa Müdafiə Fondu (EDF), Avropa İttifaqının Müdafiə Agentliyi və Ukraynanın Brave1 platformasının səylərini birləşdirir. Layihə çərçivəsində hərbi texnologiyaların real döyüş şəraitində qiymətləndirilməsi üçün büdcəsi 35 milyon avro olan yeni sınaq platforması yaradılıb.
Bundan əlavə, 2026-cı il mart ayında Avropa Komissiyası Avropa İttifaqı və Ukraynanın müdafiə-sənaye kompleksinin inkişafı üçün 1,5 milyard avro dəyərində iş proqramını təsdiqləyib.
Avropa İttifaqının Ukraynaya ayırdığı 90 milyard avroluq kredit çərçivəsində hərbi yardımın ilk tranşı Ukrayna istehsalı olan pilotsuz uçuş aparatlarının alınmasına yönəldiləcək.
Sevinc Əliyeva
Ordu.az
