Ordu.az xəbər verir ki, bu barədə “Reuters” agentliyi məlumat yayıb.

Fransa Prezident Administrasiyasının nümayəndəsi brifinq zamanı Parisin addımlarının səbəbini belə izah edib: “Bu gün yeni səylər göstərməli olmağımızın səbəbi Hörmüz blokadasının davam etməsi, dünya iqtisadiyyatına dəyən ziyanın getdikcə daha nəzərəçarpan olması və döyüş əməliyyatlarının uzanması riskinin son dərəcə ciddi olmasıdır”.

Fransa və Böyük Britaniya birlikdə çalışır və artıq bir neçə həftədir təhlükəsiz gəmiçilik üçün xüsusi təkliflər hazırlayırlar. Plan münaqişənin kəskin mərhələsi ilə bağlı qərardan sonra fəaliyyətə başlamalıdır.

“Charles de Gaulle” aviadaşıyıcısı dənizə tək çıxmayıb. Onu İtaliya və Niderland hərbi gəmiləri müşayiət edir və hazırda bütün qrup Qırmızı dənizin cənub hissəsinə doğru hərəkət edir.

Hərbçilər qarşısında aşağıdakı vəzifələr qoyulub: regiondakı operativ vəziyyəti qiymətləndirmək, böhran idarəçiliyi variantlarını genişləndirmək, tərəfdaş qüvvələri vahid müdafiə sisteminə inteqrasiya etmək, dəniz ticarəti iştirakçılarını təhlükəsizlik məsələsində əmin etmək.

Paris mürəkkəb kompromis təklif edir. İrana boğazdan öz gəmiləri üçün sərbəst keçid verilməlidir, bunun müqabilində Tehran nüvə proqramı və raketlər üzrə danışıqlara başlamalıdır. ABŞ isə öz növbəsində blokadanı aradan qaldırmalıdır.

Fransa Prezident Administrasiyasının rəsmisi əlavə edib: “Biz təklif edirik ki, İrana öz gəmilərinin boğazdan keçidi üçün imkan yaradılsın və bunun müqabilində o, amerikalılarla nüvə materialları, raketlər və region məsələləri üzrə danışıqlar aparmağı öhdəsinə götürsün. Həmçinin təklif edirik ki, amerikalılar öz növbəsində Hörmüz boğazının blokadasını aradan qaldırsınlar və əvəzində İranın danışıqlar öhdəliklərini əldə etsinlər.

Belə şəraitdə biz Hörmüz boğazından keçən konvoyların mühafizəsini təmin etmək üçün çoxtərəfli qüvvələr yerləşdirə bilərdik və bu, təbii ki, iranlıların gəmilərə atəş açmamasını tələb edir”.

Sevinc Əliyeva
Ordu.az