Ordu.az xəbər verir ki, “Yezh” “Telegram” kanalı hərəkətdə olan texnikanın görüntülərini yayımlayıb.

Bu, Ukraynanın pilotsuz uçuş aparatları və raket zərbələrinin intensivləşdiyi şəraitdə rejim üçün vacib tədbiri qorumaq məqsədilə əlavə hava hücumundan müdafiə sistemlərinin Rusiya paytaxtına yerləşdirildiyini göstərə bilər.

Bununla yanaşı, artıq Moskvanın müxtəlif mövqelərində bir neçə S-400 sistemi yerləşdirildiyi üçün görüntülərdə əlavə sistemlərin gətirildiyini, yoxsa artıq xidmətdə olan bölmələrin mövqelər arasında yer dəyişdirdiyini dəqiq müəyyənləşdirmək mümkün deyil.

2026-cı ilin yazına olan məlumata görə, Moskva iki sıx çoxtəbəqəli hava hücumundan müdafiə halqası və şəhərin daxilində yerləşdirilmiş bir neçə əlavə mövqe ilə qorunur.

Açıq mənbə təhlillərinə əsasən, paytaxt və ətrafında təxminən 130 hava hücumundan müdafiə mövqeyi yerləşdirilib.

Moskvanın hava hücumundan müdafiə şəbəkəsinin əsasını pilotsuz uçuş aparatları və qanadlı raketləri məhv etmək üçün nəzərdə tutulan təxminən 100 “Pantsir-S1” zenit-raket-top sistemi və daha az sayda “Tor” sistemi təşkil edir.

Bunlar qanadlı və ballistik raket təhdidlərinə qarşı nəzərdə tutulmuş təxminən 20 S-400 batareyası ilə gücləndirilir.

Belə genişmiqyaslı hava hücumundan müdafiə sisteminə baxmayaraq, Rusiya rejimi 2026-cı ildə Ukrayna ilə müharibənin başlanmasından sonra ilk dəfə 9 may paradını hərbi texnika olmadan, azaldılmış formatda keçirməyi planlaşdırır.

Mənbələrin məlumatına görə, Moskva mayın 5-i, 7-si və 9-da mobil rabitəyə ciddi məhdudiyyətlər tətbiq edə bilər.

Rəsmilər təhlükəsizlik səbəbləri ilə hərbi məktəb kursantları və kadet korpusu tələbələri olmadan yalnız piyada paradının keçirilməsini də nəzərdən keçirirlər.

Bununla yanaşı, 2026-cı il paradının hava hissəsinin keçirilməsi hələ də planlaşdırılır.

Paytaxtdan kənarda isə bir çox bölgələr Ukrayna pilotsuz uçuş aparatlarının hücum təhlükəsinə görə mayın 9-u hərbi paradlarını ya ləğv edir, ya da əhəmiyyətli dərəcədə ixtisar edir.

Belə ki, Krasnodar diyarının qubernatoru Veniamin Kondratyev bölgə paytaxtında təntənəli hərbi paradı tamamilə ləğv edib və “Ölümsüz Alay” tədbirini onlayn formata keçirib. Oxşar qərarlar Kalininqrad və Samarada da qəbul olunub.

Sankt-Peterburq, Çuvaşıstan və Kaluqa vilayətində isə paradlar ənənəvi T-34 tankı da daxil olmaqla hərbi texnika olmadan keçiriləcək.

Sevinc Əliyeva
Ordu.az