Ordu.az xəbər verir ki, bu barədə “The Indian Express” nəşri yazıb.
Nəşrə görə, Ermənistan müdafiə nazirinin birinci müavini və Silahlı Qüvvələrin Baş Qərargah rəisi, general-leytenant Edvard Asryan Hindistanın Müdafiə Qərargahının rəisi, general Anil Çauhan, aviasiya baş marşalı A.P. Sinqh və müdafiə naziri Rajeş Kumar Sinqh ilə yüksək səviyyəli danışıqlar aparıb.
“Müzakirələrin əsas mövzusu hərbi texnikanın birgə hazırlanması, silahlı qüvvələrin modernləşdirilməsi və strateji əməkdaşlığın dərinləşdirilməsi olub.
Hindistanın Birləşmiş Müdafiə Qərargahının (IDS) açıqlamasında qeyd olunur ki, tərəflər “hərbi texnikanın hazırlanması sahəsində birgə müəssisələrin yaradılması imkanlarını” araşdırıblar. Bu, ənənəvi alıcı-satıcı münasibətlərindən birgə hazırlama və yerli istehsal sahəsində tərəfdaşlığa keçidi göstərir.
Ehtimal olunur ki, Ermənistan öz hərbi-sənaye kompleksinin modernləşdirilməsi çərçivəsində Hindistan istehsalı olan müəyyən müdafiə sistemlərinin daxili istehsalı və ya inteqrasiyası variantlarını araşdırır.
“Həmçinin etibarlı şəkildə məlumdur ki, danışıqlar Hindistan istehsalı olan “yer-yer” sinfinə məxsus “Pralay” taktiki kvaziballistik raket sistemlərinin əldə edilməsi dəyəri ətrafında aparılır, çünki İrəvan Azərbaycanın uzaqmənzilli yüksək dəqiqlikli zərbə vasitələrinə, o cümlədən İsrail istehsalı olan LORA raketlərinə qarşı çəkindirməni gücləndirməyə çalışır”, - deyə Hindistan nəşri yazır.
Nəşrin mənbələri bildiriblər ki, istənilən sövdələşmə Hindistanın ixraca nəzarət sistemi (SCOMET) və Raket Texnologiyalarına Nəzarət Rejiminə (MTCR) uyğun olmalıdır.
“Bu çərçivədə ixrac edilən variantlar beynəlxalq öhdəliklərə uyğunlaşdırılır. Razılaşma yekun olaraq imzalandıqda, bu, artilleriya, hava hücumundan müdafiə və strateji zərbələr sahəsində mövcud əməkdaşlığa əlavə olaraq, ikitərəfli müdafiə əlaqələrinin əhəmiyyətli genişlənməsi demək olacaq və Hindistanın yüksək sinfə məxsus raketlərin ixracı sahəsində ən mühüm nailiyyətlərindən birinə çevriləcək.
Mənbələr həmçinin bildiriblər ki, general-leytenant Asryanın aviasiya baş marşalı A.P. Sinqh ilə ayrıca danışıqları çoxsəviyyəli hava hücumundan müdafiə arxitekturasına, qırıcıların döyüş qabiliyyətinin artırılmasına və pilotsuz uçuş aparatları ilə raket təhdidlərindən müdafiəyə həsr olunub”, - deyə məqalədə qeyd edilir.
Nəşr bildirir ki, silahlı qüvvələrin modernləşdirilməsinə yönəlmiş daha geniş tələblər də müzakirə olunub.
“Məlum olub ki, Ermənistan uzaqmənzilli Hindistan istehsalı “Astra” MK1 “hava-hava” sinfinə məxsus raketinin alınması və öz “Su-30SM” qırıcı parkının mümkün modernləşdirilməsi imkanını nəzərdən keçirir.
Ermənistan Hindistan müdafiə sistemlərinin ən böyük xarici alıcılarından birinə çevrilib, müqavilələrin həcmi 1,5 milyard dollardan çox qiymətləndirilir. Əlavə sifarişlərin razılaşdırılması ilə ümumi dəyərin artacağı gözlənilir.
Ermənistan Hindistandan cəbhə xətti üçün kompleks silah sistemləri alıb. Onların sırasında “Pinaka” yaylım atəşli reaktiv sistemləri, “Akash” zenit-raket sistemləri, “Swathi” artilleriya kəşfiyyat radarları, pilotsuz uçuş aparatlarına qarşı platformalar, reaktiv mərmilər, sursat və köməkçi avadanlıqlar var.
Bu səfər general Anil Çauhanın bu ilin fevralında Ermənistana səfərindən sonra baş tutub. Bu səfər yüksək rütbəli Hindistan hərbçisinin Ermənistana ilk məlum rəsmi səfəri idi və ikitərəfli müdafiə əməkdaşlığının davamlı dinamikasını vurğulayır”, - deyə müəllif vurğulayır.
Alpər Mövludoğlu
Ordu.az
