Ordu.az xəbər verir ki, bu barədə “BBC” xəbər verib.

“Mən narahat deyildim. Mənim üçün bu həyatda hər şey aydındır. Biz dəli bir dünyada yaşayırıq”, - deyə Tramp Vaşinqtondakı oteldə baş vermiş atışmanın ertəsi günü bildirib.

ABŞ mediasının məlumatına görə, hücumda 31 yaşlı Koul Tomas Allen şübhəli bilinir. Polis bildirib ki, o, tədbirə daxil olan şəxslərin yoxlanıldığı yerin yaxınlığında atəş açdıqdan sonra saxlanılıb. O, bazar ertəsi məhkəmə qarşısına çıxmalıdır.

Hadisəni Federal Təhqiqat Bürosunun cinayət bölməsi və onun antiterror qrupu araşdırır.

ABŞ-nin baş prokuroru Todd Blanş bildirib ki, ilkin məlumatlara əsasən, şübhəlinin hədəfi tədbirdə iştirak edən Ağ Evin yüksəkvəzifəli nümayəndələri olub. O əlavə edib ki, ehtimal olunan atıcının motivi hələ də araşdırılır.

Şənbə günü keçirilən şam yeməyində Trampı administrasiyasının yüksəkvəzifəli üzvləri müşayiət edirdi. Onların arasında vitse-prezident Cey Di Vens, səhiyyə naziri kiçik Robert Kennedi, mətbuat katibi Kerolayn Levit və müşavir Stiven Miller də olub.

Sevinc Əliyeva
Ordu.az