Ordu.az xəbər verir ki, diqqətçəkən digər hadisə isə İrana məxsus F-5E döyüş təyyarəsi ilə Küveytdəki ABŞ hava bazasının vurulduğu iddiası olub.
ABŞ rəsmilərinə, Konqres məsləhətçilərinə və Amerika Sahibkarlıq İnstitutunun (AEI) qiymətləndirmələrinə əsaslandırılan məlumatlara görə, hücumların ictimaiyyətə açıqlanandan çox daha ağır ziyana səbəb ola biləcəyi qiymətləndirilir. İlk qiymətləndirmələrə görə, yalnız infrastrukturun təmir xərclərinin 5 milyard dolları keçə biləcəyi bildirilir.
AEI-nin analizinə görə, İran Qətər, Birləşmiş Ərəb Əmirlikləri, Bəhreyn, İordaniya, Küveyt, İraq və Səudiyyə Ərəbistanında yerləşən ümumilikdə 11 hərbi bazada 100-dən çox hədəfi vurub. Hücumların hədəf siyahısında hava bazaları və uçuş-enmə zolaqları, təyyarə anqarları və anbarlar, komanda-nəzarət mərkəzləri, peyk rabitəsi infrastrukturu, radar və hava hücumundan müdafiə elementləri yer alıb.
Bəzi bölgələrdə onlarla hava platformasının da hücumlardan təsirləndiyi bildirilir.
F-5E ilə “Camp Buehring” hücumu iddiası
Hesabatda ən diqqətçəkən məqam isə İran Hərbi Hava Qüvvələrinə məxsus F-5E döyüş təyyarəsi ilə bağlı iddia olub.
İddiaya görə, İrana məxsus F-5E döyüş təyyarəsi müharibənin ilk günlərində Küveytdə yerləşən “Camp Buehring” bazasına qarşı hücum həyata keçirib. Təyyarə intensiv hava hücumundan müdafiə sistemlərinə baxmayaraq, aşağı hündürlükdən yaxınlaşaraq hədəfə çatıb və klassik sursatla hücum həyata keçirib.
Bu iddia doğrudursa, uzun illərdən sonra ilk dəfə düşmənə məxsus sabit qanadlı döyüş təyyarəsi təbəqəli hava hücumundan müdafiə ilə qorunan ABŞ hərbi bazasını birbaşa hədəfə alıb.
Lakin hücumun texniki detalları və təyyarənin aqibəti barədə dəqiq məlumat verilməyib.
“Camp Buehring” ABŞ-nin Yaxın Şərqdəki əməliyyatları üçün kritik logistika və qüvvə yerləşdirmə mərkəzi kimi önə çıxır. Bazanın vurulması ABŞ-nin regiondakı logistika və qüvvə yerləşdirmə qabiliyyətinə birbaşa təsir edə biləcək inkişaf kimi qiymətləndirilir.
Kritik bazalarda ziyan
Sahədən gələn qiymətləndirmələr bəzi kritik bazalarda diqqətçəkən ziyanların meydana gəldiyini göstərir.
Bəhreyndə yerləşən ABŞ Donanmasına məxsus 5-ci Donanma Qərargahında qərargah binası ciddi ziyan görüb. Bazanın digər hissələrində isə təmir edilə biləcək xarakterdə dağıntılar yaranıb.
Qətərdəki “Al Udeid” Hava Bazasında uçuş-enmə zolağının bir hissəsi istifadəyə yararsız hala düşüb. Küveytdə yerləşən “Ali Al Salem” Hava Bazasında isə bir neçə anqar və anbar vurulub.
İraqın Ərbil şəhərindəki hərbi bazada sursat anbarı obyektində ziyan meydana gəlib. Birləşmiş Ərəb Əmirliklərindəki “Al Dhafra” Hava Bazasında isə yanacaq anbarları, anqarlar, kazarmalar və müxtəlif dəstək obyektləri zərər görüb.
Digər bölgələrdə isə daha çox inzibati tikililər və dəstək infrastrukturunun hədəf alındığı bildirilir.
Hava hücumundan müdafiə elementləri ziyan görüb
Hesabatda bəzi radar və hava hücumundan müdafiə elementlərinin də hücumlarda zərər gördüyü bildirilir. ABŞ rəsmilərinə görə, regionda ən azı iki hava hücumundan müdafiə sistemi sıradan çıxarılıb.
Bu vəziyyət, xüsusilə müharibənin ilk günlərində intensiv raket və pilotsuz uçuş aparatı hücumları ilə hava hücumundan müdafiə təbəqələrinin doyurulmuş ola biləcəyi və bu sayədə məhdud sayda hava platformasının da hədəfə çata bildiyi ehtimalını gündəmə gətirir.
Bazalar böyük ölçüdə boşaldılmışdı
Hücumların baş verdiyi dövrdə ABŞ bazalarının mühüm hissəsinin personaldan təmizləndiyi bildirilir.
Bu vəziyyət bazaların İranın ballistik raket və kamikadze pilotsuz uçuş aparatı hücumlarına qarşı daha müdafiəsiz hala gəlməsinə səbəb olub. Müvəqqəti olaraq fərqli bölgələrə köçürülən personalın gərginliyin azalması ilə birlikdə yenidən yerləşdirilməsi planlaşdırılır.
Hesabatda yer alan bir çox hücum və ziyan təsbiti hələ müstəqil mənbələr tərəfindən təsdiqlənməyib. ABŞ Müharibə Nazirliyi də məsələ ilə bağlı ətraflı rəsmi açıqlama verməyib.
Sevinc Əliyeva
Ordu.az
