Ordu.az xəbər verir ki, bu barədə “Press TV” məlumat yayıb.

Nazirliyin sözçüsü, briqada generalı Rza Talayi-Nik şənbə günü yaydığı bəyanatda bildirib ki, ölkə aprelin 7-dək ABŞ-nin və İsrailin tammiqyaslı, “qanunsuz təcavüzü”nə fəal şəkildə müqavimət göstərməsinə baxmayaraq, müdafiə və cavab hazırlığı yüksək səviyyədə qalır.

O qeyd edib ki, ABŞ-İran hərbi kampaniyası boyunca ölkənin silahlı qüvvələri İsrail üzərində hava üstünlüyünü qoruyub saxlayıb.

Rəsmi şəxs bildirib ki, hazırda ölkədə istehsal olunan silahlar tamamilə yerli istehsal xətləri üzərində hazırlanır.

“Bu imkan müdafiə sənayesinə 25 ildən çox müddətdə yatırılmış sərmayələrin və görülmüş hazırlıq işlərinin nəticəsidir. Hətta bəzi obyektlərə ziyan dəydikdən sonra belə, istehsal və dəstək ölkənin bütün ərazisində davam edir. Bu prosesdə təxminən 9000 şirkət silahlı qüvvələr və Müdafiə Nazirliyi ilə əməkdaşlıq edir”, - deyə o qeyd edib.

Talayi-Nik bildirib ki, İran İslam Respublikasının davam edən “qanunsuz Amerika blokadası”na cavab olaraq bütün gəmiçiliyə bağladığı strateji əhəmiyyətli Hörmüz boğazı “İran xalqının tələblərinin həyata keçirilməsi üçün nəzarət rıçağına çevrilib”. Onun sözlərinə görə, blokada tətbiq edilərkən silahlı qüvvələr dəfələrlə düşmən qüvvələrini Oman körfəzində geri çəkilməyə məcbur edib və bunu düşünülmüş, detallı nəzarət tədbirləri ilə həyata keçirib.

O, həmçinin ölkənin islam quruluşunu dəstəkləyən milyonlarla insanın iştirakı ilə bütün ölkə üzrə keçirilən kütləvi yürüşləri yüksək qiymətləndirərək onları “sosial möcüzə” adlandırıb. Nazirliyin sözçüsü qeyd edib ki, ümummilli kampaniyada iştirak etmək üçün 30 milyondan çox insan qeydiyyatdan keçib və onlar düşmənlərə qarşı xalqı qətiyyətlə müdafiə etməyə hazır olduqlarını ifadə ediblər.

Onun sözlərinə görə, bu, bütün dünyada görünməmiş kütləvi səfərbərlik nümunəsidir və “düşmənin milləti parçalamaq cəhdlərini puça çıxarıb”.

Sevinc Əliyeva
Ordu.az