Ordu.az xəbər verir ki, bu barədə CNN bu gün dərc olunmuş geniş sorğunun nəticələrinə istinadən məlumat yayıb.

Avrodan istifadə edən 21 ölkənin istehsal və xidmət sektorları rəhbərləri arasında aparılmış sorğular əsasında hazırlanan son satınalma menecerləri indeksi çərşənbə günü açıqlanıb. Bu, Avropa İttifaqında iqtisadiyyatı enerji daşıyıcılarının kəskin bahalaşmasından qorumaq üçün nəzərdə tutulan fövqəladə tədbirlərlə bağlı bəyanatdan sonra baş verib.

“Avrozona Yaxın Şərqdəki müharibə səbəbindən dərinləşən iqtisadi çağırışlarla üzləşir”, - deyə PMI məlumatlarını hazırlayan “S&P Global” şirkətinin baş iqtisadçısı Kris Uilyamson bəyanatda bildirib.

Uilyamson, həmçinin qeyd edib: “Münaqişə apreldə iqtisadi daralmaya səbəb oldu, eyni zamanda inflyasiyanı kəskin artırdı”.

O bildirib ki, bundan sonra geniş yayılmış “təchizat çatışmazlığı” iqtisadi artımı daha da zəiflətmək və qiymətləri artırmaq təhlükəsi yaradır. Uilyamson qeyd edib ki, aprelin PMI göstəriciləri avrozonada ikinci rübdə ümumi daxili məhsulun 0,1% azalacağını göstərib.

“Müharibə indi ən çox xidmət sektoruna zərbə vurur. Burada işgüzar fəallıq 2021-ci ilin əvvəlində pandemiya səbəbindən tətbiq edilən karantindən bəri görünməyən sürətlə azalır”, - deyə o qeyd edib.

Böyük Britaniyada PMI məlumatları daha qarışıq mənzərə yaradır. Özəl sektor istehsalı bu ay daha sürətli templə artsa da, giriş xərclərində inflyasiya kəskin sürətlənib.

“Artımın yaxşılaşması qismən qiymət artımı və müharibə ilə bağlı təchizat çatışmazlığı qorxularından əvvəl alışları təmin etmək istəyinin yaratdığı qısamüddətli təkanla bağlıdır”, - deyə Uilyamson Böyük Britaniya üzrə press-relizdə bildirib.

O əlavə edib ki, münaqişə həmçinin məşğulluğun və biznes etimadının azalmasına səbəb olub ki, bu da qarşıdakı aylarda iqtisadi artım üçün yaxşı əlamət deyil.

Sevinc Əliyeva
Ordu.az