Ordu.az xəbər verir ki, bu barədə Ermənistanın “Past” nəşri “İranla müharibədən sonra Ermənistanın gələcəyi: təhlükələrin kəsişməsi, yoxsa yeni imkanlar pəncərəsi” başlıqlı məqaləsində yazıb.
Nəşrin əldə etdiyi məlumata görə, ekspert dairələrində vəziyyət “uzunmüddətli qeyri-sabitliyin başlanğıcı” kimi qiymətləndirilir. Bu şəraitdə Cənubi Qafqaz ikinci dərəcəli, lakin mühüm təzyiq zonasına çevrilə bilər.
“Ermənistan üçün bu müharibə ilk növbədə ciddi təhlükəsizlik çağırışıdır. İran ölkənin cənubda yeganə açıq sərhədidir və orada hərbi əməliyyatların dərinləşməsi sərhədlər üçün birbaşa riskin artması deməkdir. Təkcə qaçqın axınının deyil, həm də sərhədyanı rayonlarda qeyri-sabitliyin yayılmasının, o cümlədən hibrid təhdidlərin yaranmasının istisna edilmədiyi bildirilir.
İqtisadi nəticələr artıq hiss olunmağa başlayır. İran istiqamətində logistika zəncirlərinin pozulması, tranzit marşrutlarının məhdudlaşdırılması və enerji layihələri ilə bağlı qeyri-müəyyənlik Ermənistan iqtisadiyyatına ciddi zərbə vura bilər. Qiymət artımı, bazarların yenidən formalaşması və xarici ticarətin çətinləşməsi obyektiv reallığa çevrilir”, - deyə məqalədə qeyd edilib.
Nəşr bildirib ki, eyni zamanda, mürəkkəb, lakin nəzəri baxımdan faydalı vəziyyət də yaranır.
“İranın müharibəyə cəlb olunması onun digər regional istiqamətlərdə fəallığını azaldır, bu isə güc vakuumu yaradır. Belə şəraitdə Ermənistan müxtəlif qütblər arasında nisbi tarazlığı qoruya bilsə, kommunikasiya və danışıqlar platforması kimi öz əhəmiyyətini artırmağa cəhd göstərə bilər.
Beynəlxalq aktorların fəallaşması da qaçılmazdır. Avropa İttifaqı və NATO artıq regiona diqqəti artırır və yeni qeyri-sabitlik ocaqlarının yaranmasının qarşısını almağa çalışırlar. Lakin bunun ikili təsiri var. Bir tərəfdən yeni investisiyalar və dəstək mümkündür, digər tərəfdən isə xarici asılılıqların artması riski yüksəlir.
Daxili siyasi müstəvidə də nəticələr tez üzə çıxa bilər. Xarici müharibə fonunda hakimiyyət təhlükəsizlik təhdidlərinə istinad edərək daxili mövqelərini möhkəmləndirməyə çalışa bilər. Lakin cəmiyyətdə sosial-iqtisadi gərginliyin artması əks təsir göstərə və daxili qütbləşməni dərinləşdirə bilər”, - deyə müəllif yazıb.
Nəşrə görə, aydındır ki, İranla müharibənin bu mərhələsi Ermənistan üçün sadəcə xarici hadisə deyil.
“Bu, ölkənin iqtisadi, siyasi və təhlükəsizlik mühitini yenidən formalaşdıra biləcək sistemli çağırışdır. Belə şəraitdə Ermənistanın gələcəyi müharibənin təsir edib-etməyəcəyindən deyil, ölkənin artıq başlamış dəyişikliklərə nə dərəcədə səmərəli reaksiya verə biləcəyindən və sürətlə dəyişən dünya nizamında öz subyektliyini nə qədər qoruya biləcəyindən asılıdır”, - deyə müəllif vurğulayıb.
Alpər Mövludoğlu
Ordu.az
