Ordu.az xəbər verir ki, 2026-cı il mayın 5-9-da İstanbul Sərgi Mərkəzində keçiriləcək tədbir “Texnologiyaya hökm et, gələcəyi formalaşdır” vizyonu ilə sərmayə, biznesin inkişafı və kommersiyalaşdırma yönümlü strateji platforma kimi mövqelənir.
Qlobal miqyasda böyüyən təşkilat
2018-ci ildə 12 ölkədən 183 şirkətin iştirakı ilə başlayan SAHA Sərgisi illər ərzində sürətli böyümə göstərərək beynəlxalq müdafiə sənayesi tədbirləri arasında mühüm yer tutub.
2024-cü ildə əldə olunan miqyas:
121 ölkədən 1478 şirkət 90 min kvadratmetrlik sahədə yer alıb, ümumi ziyarətçi sayı 100 mini ötüb. Tədbir çərçivəsində 22 mindən çox B2B görüş keçirilib, 6,2 milyard dollar dəyərində 133 müqavilə imzalanıb.
SAHA 2026-nın isə daha böyük təşkilat olması hədəflənir. Sərgidə 120-dən çox ölkədən 1700-dən artıq şirkətin iştirakı, 25 mindən çox iş görüşünün keçirilməsi və 200 mindən çox ziyarətçiyə çatılması planlaşdırılır.
Müdafiə ekosistemi qərarvericilərlə görüşəcək
SAHA 2026-nın ən kritik ünsürlərindən biri yüksək səviyyəli rəsmi və kommersiya nümayəndə heyətlərinin iştirakı olacaq. Satınalma və təchizat heyətləri şirkətlərlə birbaşa təmas quraraq ortaq istehsal, texnologiya paylaşımı və uzunmüddətli əməkdaşlıqlar üçün görüşlər keçirəcək.
Eyni zamanda dövlət nümayəndələri və sektor liderləri müdafiə sənayesi ekosisteminin imkanlarını yerində araşdıraraq strateji əməkdaşlıqlar üçün zəmin yaradacaq.
Yeni nəsil texnologiyalar nümayiş olunacaq
Sərgi yalnız bir nümayiş sahəsi olmaqdan əlavə, müdafiə texnologiyalarının ilk dəfə tanıdıldığı innovasiya mərkəzi xüsusiyyəti daşıyır.
Tədbir çərçivəsində:
Süni zəka dəstəkli sistemlər
İnsansız quru, hava və dəniz vasitələri
Avtonom texnologiyalar
Radioelektron mübarizə həlləri
Yeni nəsil sursat sistemləri kimi bir çox qabaqcıl texnologiya məhsulu ilk dəfə nümayiş olunacaq.
Bundan əlavə 300-dən çox yeni məhsul təqdimatının keçirilməsi nəzərdə tutulur.
Canlı nümayişlər və yarışmalar ön plana çıxacaq
SAHA 2026 dinamik tədbir quruluşu ilə də diqqət çəkir. Genişləndirilmiş açıq sərgi sahəsi çərçivəsində dəniz platformaları Sarayburnu və Ataköy Limanında ziyarətçilərə açıq olacaq.
Bununla yanaşı:
FPV pilotsuz uçuş aparatı sahəsi
SAHA İnsansız Quru Platforması Mübarizəsi
SAHA “Rover” Mübarizəsi kimi təşkilatlar real əməliyyat ssenarilərinə yaxın nümayişlər təqdim edəcək.
Önə çıxan tədbirlərdən biri olan “World Drone Wars” isə FPV pilotsuz uçuş aparatı texnologiyalarının real müharibə şəraitinə bənzər mühitlərdə sınaqdan keçirilməsini təmin edən yenilikçi platforma kimi diqqət çəkir.
“SAHA Talks” və “Space Dome” diqqət çəkəcək
Sərgi çərçivəsində təşkil ediləcək SAHA Talks və əsas çıxış sessiyalarında rəqəmsal transformasiya, süni zəka, ikili istifadə texnologiyaları və dəyişən təhdid mühiti kimi kritik mövzular müzakirə olunacaq.
Kosmos texnologiyalarına yönəlmiş “Space Dome” sahəsi isə astronavtları, beynəlxalq mütəxəssisləri və sektor liderlərini bir araya gətirən xüsusi platforma olacaq.
Türkiyənin qlobal texnologiya vizyonuna töhfə
SAHA 2026 yalnız bir sərgi olmaqdan əlavə, müdafiə sənayesi, istehsal qabiliyyəti və innovasiyanı bir araya gətirən geniş biznes inkişaf platforması kimi ön plana çıxır.
Tədbir Türkiyə şirkətlərinin qlobal təchizat zəncirinə inteqrasiyasını sürətləndirərkən, eyni zamanda beynəlxalq sərmayəçilər və strateji tərəfdaşlarla birbaşa əlaqə imkanı yaradır.
Bu baxımdan SAHA 2026 Türkiyənin müdafiə və aviasiya sahəsində qlobal texnologiya istehsal mərkəzi olmaq hədəfini dəstəkləyən ən mühüm təşkilatlardan biri kimi mövqelənir.
Sevinc Əliyeva
Ordu.az
