Ordu.az xəbər verir ki, təxminən 870 810 avro (təxminən 1 milyon dollar) dəyərində olan müqavilə təcili və məcburi əməliyyat tələbləri çərçivəsində, standart rəqabətli tender prosesləri kənara qoyularaq verilib.
Almaniyanın Lüdviqshafen şəhərində yerləşən DRONIVO “GmbH” “eBee” VISION sistemlərinin Almaniyadakı müstəsna distribütorudur. Bu vəziyyət sistemin istehsalçısı “EagleNXT”nin Qlobal Satış və Biznesin İnkişafı üzrə vitse-prezidenti Steven D. Mathias tərəfindən yazılı şəkildə təsdiq edilib. Bu müstəsna səlahiyyət DRONIVO-nu qeyd olunan zaman aralığında təhvil verə biləcək yeganə təchizatçı halına gətirib.
“eBee” VISION qabiliyyətləri və əməliyyat ehtiyacı
“eBee” VISION ABŞ Ordusunun Orta Mənzilli Kəşfiyyat (MRR) tapşırıq kateqoriyasına daxil olan sabit qanadlı kiçik pilotsuz uçuş aparatı sistemidir. Ən azı 90 dəqiqə havada qalma müddəti və 15 ilə 40 kilometr mənzili ilə son dövrdə meydanda geniş yayılmış qısa mənzilli FPV pilotsuz uçuş aparatlarından açıq şəkildə daha yüksək performans təqdim edir. Platforma elektro-optik, infraqırmızı və termal görüntüləmə sensorları daşıya bilir, bundan başqa, opsional radioelektron mübarizə məlumat toplama qabiliyyətinə də malikdir. Sistem 900 MHz və 2.4 GHz tezliklərində şifrələnməmiş radio bağlantıları ilə işləyir və üç nəfərdən ibarət qrup tərəfindən meydanda istifadə oluna biləcək şəkildə hazırlanıb. Vahid dəyəri isə 50 000 dolların altında saxlanılır.
ABŞ-nin müdafiə təchizat standartları baxımından kritik olaraq, “eBee” VISION sistemi “Defense Innovation Unit”in “Blue” UAS çərçivəsinə uyğundur və Milli Müdafiə Səlahiyyətləndirmə Qanununun tələblərinə cavab verir. Bu çərçivədə sistem Çin mənşəli komponent ehtiva etmir və Pentaqonun kibertəhlükəsizlik və təchizat zənciri audit meyarlarına uyğunluq nümayiş etdirir. Sənəddə həmçinin sistemin hazırlanmasında Ukraynadakı müharibə şəraitində aparılan sınaqlardan əldə edilən real döyüş məlumatlarından istifadə olunduğu qeyd edilir. Bu amil son dövrdə Avropada yerləşən pilotsuz uçuş aparatı istehsalçılarının NATO tenderlərində önə çıxardığı mühüm faktora çevrilib.
ABŞ ordusunun bazar araşdırması alternativ həllərin yetərsiz qaldığını ortaya qoydu. “Vantage Robotics”in VESPER modeli tələb olunan texniki meyarlara cavab vermədiyi halda, “Astro Max” sistemi qısa mənzilli platforma kimi qiymətləndirilib və MRR tapşırıqları üçün uyğun hesab olunmayıb. Başqa təchizatçı tərəfindən təqdim edilən SKYDIO pilotsuz uçuş aparatı isə Əməliyyat və Baxım büdcəsi ilə satın alına bilmədiyi üçün qiymətləndirmədən kənarlaşdırılıb. Heç bir alternativ təchizatçı tələb olunan müddət ərzində təhvil verə biləcəyini göstərə bilməyib.
Bu təchizat şirkət və tabor səviyyəsində geniş istifadə olunan qısa mənzilli FPV pilotsuz uçuş aparatları ilə briqada səviyyəsində məhdud sayda mövcud olan daha ağır kəşfiyyat-müşahidə sistemləri arasındakı boşluğu doldurmağı hədəfləyir. “eBee” VISION orta mənzilli kəşfiyyat tapşırıqlarını yerinə yetirə biləcək qədər qabiliyyətli, lakin kiçik qrup tərəfindən əlavə aviasiya infrastrukturu tələb etmədən istifadə oluna biləcək qədər yüngül həll təqdim edir.
Müqavilə çərçivəsində DRONIVO tərəfindən təmin ediləcək 10 pilot hazırlığı sessiyası ilə birlikdə təlim materialları da paketə daxil edilib. Beləliklə, 2-ci Süvari Alayı heyətinin sistemləri təhvil alan kimi istifadəyə hazır vəziyyətə gəlməsi hədəflənir. Almaniyanın Vilzek şəhərindəki “Rose” kazarmasında yerləşən birlik ABŞ ordusunun Avropadakı ən mühüm zirehli ünsürlərindən biri olub NATO təlimlərində mütəmadi olaraq iştirak edir.
“Saber Strike” təlimi ABŞ-nin Avropa və Afrika Komandanlığı tərəfindən Baltik regionu və Mərkəzi Avropada NATO müttəfiqləri arasında birgə işləmə qabiliyyətini artırmağa yönəlik təşkil olunur. Təlim xüsusilə mübahisəli ərazilərdə fəaliyyət göstərən quru birlikləri üçün kəşfiyyat və vəziyyət barədə məlumatlılıq qabiliyyətlərinə yüksək səviyyədə ehtiyac duyur. “eBee” VISION təchizatının təcililiyi, Avropadakı ABŞ birliklərinin kiçik pilotsuz uçuş aparatı sistemlərinə artan asılılığını və bu ehtiyacın böyük ölçüdə Ukraynadakı müharibə təcrübəsindən qaynaqlandığını açıq şəkildə ortaya qoyur.
Sevinc Əliyeva
Ordu.az
