Ordu.az xəbər verir ki, bu barədə Türkiyə KİV-ləri məlumat yayıb.
Qrup “Yeni Nəsil Mobil Təbəqəli PUA Əleyhinə (C-UAS) Müdafiə Arxitekturası”nı Malayziyada keçirilən DSA 2026 sərgisi çərçivəsində beynəlxalq iştirakçılara təqdim edib.
DSA 2026 “Defence Services Asia” çərçivəsində həyata keçirilən təqdimat “SYS Grup”un Asiya-Sakit okean bazarındakı mövqeyini gücləndirmək hədəfinin bir hissəsi kimi önə çıxır. Aprelin 23-nə qədər davam edəcək sərgi regionun ən mühüm müdafiə tədbirlərindən biri kimi qəbul olunur.
“SYS Grup” sərgidə yalnız bir məhsul nümayiş etdirməkdən daha çox, müasir döyüş meydanının transformasiyasına cavab verən inteqrasiya edilmiş müdafiə yanaşmasını ortaya qoyur. Xüsusilə sürü PUA hücumlarının və aşağı dəyərli PUA təhdidlərinin artması bu cür təbəqəli həlləri kritik edir.
Təbəqəli arxitektura: Sensordan atəş gücünə qədər inteqrasiya edilmiş struktur
“SYS Grup”un hazırladığı arxitektura müxtəlif mənzil təbəqələrində fəaliyyət göstərən inteqrasiya edilmiş komponentlərdən ibarətdir. Sistemin mərkəzində UNIROBOTICS tərəfindən hazırlanmış TRAKON uzaqdan idarə olunan silah sistemləri yer alır. Bu struktur hədəfin aşkarlanması, izlənməsi və nişanalma proseslərini vahid rəqəmsal şəbəkə üzərindən idarə edə biləcək şəkildə qurulub.
Atəş gücü tərəfində isə “CANiK” imzalı ağır pulemyot ailəsi önə çıxır. Yüksək atım sürətinə malik bu sistemlər xüsusilə aşağı hündürlük və yaxın məsafəli PUA təhdidlərinə qarşı sürətli reaksiya təmin edir.
Orta çap təbəqəsində isə Britaniyada yerləşən “AEI Systems” tərəfindən hazırlanmış 30×113 mm VENOM LR topu işə düşür. Aşağı geri təpmə və tənzimlənə bilən atım sürəti kimi xüsusiyyətlər sistemi həm mobil platformalar, həm də inteqrasiya edilmiş müdafiə həlləri üçün uyğun edir.
Bu çox təbəqəli struktur sayəsində sistem mini PUA-lardan sürü PUA konsepsiyalarına qədər geniş təhdid spektrinə qarşı effektiv həll təqdim edir. Üstəlik klassik raket əsaslı hava hücumundan müdafiə sistemləri ilə müqayisədə xeyli aşağı əməliyyat xərci ilə.
Xərc və davamlılıq ön plandadır
Müasir döyüş mühitində yalnız yüksək performans deyil, davamlılıq və aşağı əməliyyat xərci də müəyyənedici olur. “SYS Grup”un hazırladığı arxitektura bu iki amili mərkəzə alaraq layihələndirilib.
Mobil struktur, sürətli yerləşdirilmə qabiliyyəti və miqyaslana bilən istehsal yanaşması sistemi xüsusilə fərqli təhdid səviyyələrinə malik ölkələr üçün çevik həll halına gətirir. Bundan başqa, təhlükəsiz təchizat zənciri və sürətli təhvil kimi amillər də sistemin önə çıxan üstünlükləri sırasındadır.
“SYS Grup”un baş icraçı direktoru Cahit Utku Aral sistemin qısa müddətdə ciddi maraq gördüyünü vurğulayaraq, DSA 2026-nın bu marağı qlobal səviyyəyə daşıyan addım olduğunu bildirib. Aral dəyişən müharibə doktrinalarının artıq yalnız güclü platformalar deyil, eyni zamanda xərc baxımından səmərəli və miqyaslana bilən həllər tələb etdiyinə diqqət çəkib.
Sevinc Əliyeva
Ordu.az
