Ordu.az xəbər verir ki, bu barədə “Reuters” məlumat yayıb.

O, müzakirələrin təfərrüatlarını açıqlamasa da, qeyd edib ki, ABŞ qoşunlarının belə çıxışı koordinasiyasız həyata keçirilərsə, Avropa üçün dağıdıcı ola bilər.

“Biz ABŞ-nin Avropanın təhlükəsizlik arxitekturasından çıxışını necə idarə etmək və ya yumşaltmaq barədə çox aktiv şəkildə müzakirə aparırıq. Tam yox, qismən. Hətta qismən çıxış belə... koordinasiyasız həyata keçirilərsə, Avropa üçün çox dağıdıcı olardı”, - deyə Fidan Türkiyənin cənubundakı Antalya vilayətində keçirilən diplomatik forumda bildirib.

Fidan qeyd edib ki, ölkəsi NATO-nun üzvü olsa da, Avropa İttifaqının üzvü deyil və uzun müddətdir NATO daxilində Avropa İttifaqı ölkələrinin “ayrı klub kimi davranmasından” narazılığını ifadə edir.

Onun sözlərinə görə, bu ölkələr bəzən alyansın mövqeyinə zidd olsa belə, müstəqil qərarlar qəbul edirlər.

“Siz NATO daxilində ayrıca Avropa İttifaqı təşkilatına çevrilmək istəyirsiniz. Yaxşı, Amerika dedi: “Mən sizi buraxıram, əlaqələrinizi kəsirəm”, - deyə Fidan bildirib.

ABŞ prezidenti Donald Tramp İranla ABŞ-İsrail müharibəsi başlandıqdan sonra Qərb hərbi alyansının Avropa üzvləri Hörmüz boğazını açmaq üçün gəmilər göndərməkdən imtina etdikdən sonra NATO-dan çıxmaqla hədələyib.

Bu qərar alyans daxilində gərginliyi daha da artırıb. Gərginlik artıq Trampın Qrenlandiyanı əldə etmək istəyini bəyan etməsindən sonra yüksəlmişdi.

NATO-nun baş katibi Mark Rütte daha əvvəl bildirib ki, o, Trampın Şimali Atlantika alyansından narazılığını anlayır, lakin Avropa ölkələrinin əksəriyyəti İran əleyhinə Vaşinqtonun hərbi səylərini dəstəkləyib.

Ağ Evin yüksək vəzifəli rəsmisi bu ay “Reuters”ə bildirib ki, NATO-dan narazı olan Tramp ABŞ-nin bəzi qoşunlarının Avropadan çıxarılmasını da müzakirə edir.

Sevinc Əliyeva
Ordu.az