Ordu.az şənbə axşamı Yaxın Şərqdə baş vermiş əsas hadisələrin qısa icmalını təqdim edir.
• ABŞ prezidenti Donald Tramp “Axios”a bildirib ki, amerikalı və iranlı danışıq aparanlar böyük ehtimalla bu həftəsonu görüşəcəklər və o, müharibənin başa çatması ilə bağlı yekun razılığa gələcəklərini gözləyir.
“İranlılar görüşmək istəyirlər. Onlar razılaşma əldə etmək istəyirlər. Düşünürəm ki, görüş böyük ehtimalla bu həftəsonu keçiriləcək. Hesab edirəm ki, növbəti bir-iki gün ərzində razılaşacağıq”, - deyə o bildirib.
Tramp bildirib ki, razılaşma “İsrailin təhlükəsizliyini təmin edəcək”. ABŞ prezidenti vurğulayıb ki, “İsrail müharibədən şərəflə çıxacaq”.
• Hörmüz boğazında yeni qayda müəyyən edilib. Bu barədə İslam İnqilabı Keşikçiləri Korpusunun Hərbi Dəniz Qüvvələri Komandanlığı açıqlama verib.
1. Qeyri-hərbi gəmilər yalnız İran tərəfindən müəyyən edilmiş marşrut üzrə hərəkət edəcəklər.
2. Hərbi gəmilərin boğazdan keçidi qadağandır.
3. Bütün keçidlər yalnız İslam İnqilabı Keşikçiləri Korpusunun Hərbi Dəniz Qüvvələrinin icazəsi ilə mümkündür.
4. Hərəkət döyüş əməliyyatları teatrında fasilə barədə razılaşma çərçivəsində və Livanda atəşkəs tətbiq edildikdən sonra həyata keçirilir.
Eyni zamanda aydınlaşdırılıb ki, İsrailin Livana zərbələrinin cümə axşamı elan edilmiş atəşkəs razılaşması çərçivəsində dayandırılması istənilir.
• İran Xarici İşlər Nazirliyinin sözçüsü İsmayıl Bəqai bildirib ki, İranın zənginləşdirilmiş uranının xaricə daşınması variantı qəbuledilməzdir.
“Zənginləşdirilmiş uran bizim üçün İran torpağı qədər müqəddəsdir və heç bir halda harasa aparılmayacaq”, - deyə o qeyd edib.
• İran parlamentinin milli təhlükəsizlik komissiyasının üzvü Əli Xəzrian bildirib ki, növbəti 24 saat ərzində düşmən görəcək ki, İran İslam Respublikası tərəfindən Hörmüz boğazının ağıllı idarə olunması dəyişməz qalır:
“İran xalqının döyüş meydanında qazandığını itirməsinə imkan verməyəcəyik. Hörmüz boğazından keçid yalnız düşmən olmayan ölkələrə və gömrük rüsumları ödənildiyi halda icazəlidir”.
Sevinc Əliyeva
Ordu.az
