Ordu.az xəbər verir ki, bu barədə İran prezidenti Məsud Pezeşkian Fransa prezidenti Emmanuel Makron ilə telefon danışığı zamanı bildirib.

“İran yalnız beynəlxalq norma və qaydalar çərçivəsində danışıqları davam etdirməyə hazırdır və məqsəd İran xalqının hüquqlarını qorumaqdır. Avropa isə ABŞ-ni bu çərçivələrə riayət etməyə təşviq edərək konstruktiv rol oynaya bilər”, - prezidentin sözlərini onun mətbuat xidməti sitat gətirib.

Pezeşkianın sözlərinə görə, ABŞ administrasiyasının irəli sürdüyü həddindən artıq tələblər və siyasi iradənin çatışmazlığı, ekspert səviyyəsində əldə olunan razılaşmalara baxmayaraq, ölkələr arasında razılaşmanın imzalanmasına mane olur.

Aprelin 11-də İran və ABŞ Pakistanın paytaxtı İslamabadda bir neçə mərhələdən ibarət danışıqlar aparıblar. İran nümayəndə heyətinə parlament sədri Məhəmməd Baqer Qalibaf, ABŞ nümayəndə heyətinə isə vitse-prezident Cey Di Vens rəhbərlik edib. Daha sonra tərəflər bildiriblər ki, bir sıra ziddiyyətlər səbəbindən uzunmüddətli tənzimləmə üzrə razılıq əldə olunmayıb. Tehran və Vaşinqton arasında dialoqun inkişaf perspektivləri qeyri-müəyyəndir. Ağ Ev aprelin 13-dən etibarən İranın dəniz blokadasını həyata keçirmək niyyətini açıqlayıb.

Sevinc Əliyeva
Ordu.az