Ordu.az xəbər verir ki, ABŞ “Patriot Advanced Capability-3 Missile Segment Enhancement” (PAC-3 MSE) hava hücumundan müdafiə raketlərinin istehsalını sürətləndirmək üçün “Lockheed Martin” ilə 4,7 milyard dollar dəyərində müqavilə bağlayıb.
Şirkətin açıqlamasına görə, bu müqavilə 2026-cı ildə ABŞ və müttəfiq qüvvələr üçün döyüşdə sınaqdan çıxmış önləyici sistemlərin rekord sayda çatdırılmasına imkan verəcək.
“Lockheed Martin Missiles and Fire Control” bölməsinin rəhbəri Tim Kehill bildirib: “İstehsal müəssisələrimizə, işçi qüvvəmizə və təchizat zəncirinə etdiyimiz yatırımlar bizə geniş miqyasda və sürətli çatdırılma imkanı verir. Doğru avadanlıqlar, sınaqdan keçmiş proseslər və ixtisaslı personal ilə sahəni və müttəfiqlərimizi dəstəkləmək üçün rekord sayda sursat çatdırmağa hazırıq”.
PAC-3 MSE raketi ballistik raketlərdən hipersəs təhdidlərinə və düşmən hava platformalarına qədər geniş spektrdə hədəfləri aşkar edib izləyə bilir. “Boeing” tərəfindən istehsal olunan axtarış başlıqları vasitəsilə hədəfi müəyyən etdikdən sonra iki pilləli bərk yanacaqlı mühərrikdən istifadə edən bu yüksək manevr qabiliyyətli önləyici raket hədəfi birbaşa toqquşma üsulu ilə məhv edir.
“Defense News”un məlumatına görə, son müqavilələr ABŞ ordusunun xüsusilə İran tərəfindən “Epic Fury” əməliyyatı zamanı istifadə olunan ucuz sursatlara qarşı bahalı önləyicilərdən asılılığının artması ilə eyni dövrə təsadüf edir.
Təxminən 35 min dollarlıq İran istehsalı “Shahed” kamikadze pilotsuz uçuş aparatının qiyməti ilə PAC-3 MSE raketinin təxminən 4 milyon dollarlıq qiyməti müqayisə edildikdə, uğurlu tətbiq zamanı xərc nisbəti İranın xeyrinə 114-ə 1 olur.
Bu qeyri-bərabərliyə baxmayaraq, ABŞ mart ayında “BAE Systems” və “Lockheed Martin” ilə THAAD önləyiciləri üçün infraqırmızı axtarıcı istehsalını 4 dəfə artırmaq barədə yeni razılaşma elan edib.
“Boeing” isə apreldə ABŞ Müharibə Nazirliyi ilə PAC-3 axtarış başlıqlarının istehsalını 3 dəfə artırmaq üçün çərçivə sazişi imzaladığını açıqlayıb. Yanvarda açıqlanan “Lockheed Martin” müqaviləsi isə illik PAC-3 MSE istehsalını 600-dən 7 il ərzində 2000-ə çatdırmağı hədəfləyir. Bundan əlavə, bu razılaşma ABŞ ilə “Lockheed Martin” arasında THAAD raketlərinin illik istehsalını 96-dan 400-ə çatdırmağı nəzərdə tutan müqavilə ilə də uzlaşır.
Sevinc Əliyeva
Ordu.az
