Ordu.az xəbər verir ki, Fransa yaxın dörd il üçün yenilənmiş hərbi planlaşdırma qanunu çərçivəsində müdafiə büdcəsini 36 milyard avro (42 milyard dollar) artırdığını açıqlayıb, eyni zamanda yeni, müvəqqəti əsas döyüş tankının hazırlanmasını nəzərdən keçirir.
Aprelin 8-də Fransanın Silahlı Qüvvələr naziri Ketrin Votren tərəfindən təqdim edilən yenilənmiş qanun layihəsi 2027-ci ildə müdafiə üçün 63,3 milyard avro (74 milyard dollar) ayrılmasını nəzərdə tutur ki, bu da son on ildə iki dəfə artım deməkdir. Həmçinin proqnozlara görə, ölkənin ümumi müdafiə xərcləri onilliyin sonuna qədər 76,3 milyard avroya (89,1 milyard dollar) çatacaq.
Bu artım əhəmiyyətli olsa da, Fransanın ÜDM-nin təxminən 2,6 faizi səviyyəsində qalacaq, bu isə ötən il NATO sammitində üzv dövlətlərin 2035-ci ilə qədər hər il ən azı 3,5 faiz ayırmaq öhdəliyindən aşağıdır. Məbləğlər həmçinin Fransa parlamentinin illik təsdiqinə tabe olacaq.
Votrenin sadaladığı prioritetlər arasında mövcud “Leclerc” tanklarının köhnəlməsi və Fransa-Almaniya birgə “Main Ground Combat System” (MGCS) layihəsinin hələ illər uzaqda olması səbəbilə qabiliyyət boşluğunu doldurmaq üçün yeni “aralıq” tankın hazırlanması da var.
“Hazırkı “Leclerc” tanklarımız 2040-cı ilə qədər xidmət edəcək, MGCS layihəsi isə təxminən on il çəkəcək... Bizə aralıq tank lazımdır, bu, ehtimal ki, KNDS “Germany” və ya KNDS “France” platforması olacaq, lakin bu məsələ hələ qərarlaşdırılmayıb, qülləsi isə Fransa tərəfindən hazırlanacaq”, - deyə Votren mətbuat konfransında bildirib. KNDS Almaniyanın “Krauss-Maffei Wegmann” və Fransanın “Nexter” şirkətlərinin birgə müəssisəsidir.
Şirkətin potensial podratçı kimi müəyyənləşdirilməsi Almaniyanın “Rheinmetall” şirkətinin 2024-cü ildə “Panther” KF51 əsas döyüş tankı üçün “Concept Unmanned Turret” (CUT) nümayiş etdirməsindən sonra baş verib. Həmin vaxt şirkət bunu MGCS layihəsinin gecikməsi halında “əlavə orta müddətli həll” kimi təqdim etmişdi.
Paris bu müddət ərzində kosmik sektorda müşahidə və rabitə imkanlarını gücləndirmək üçün əlavə olaraq 3,9 milyard avro xərcləyəcək.
Kadr hədəfləri yenilənmiş qanunun əsas diqqət mərkəzində olmasa da, Votren bildirib ki, ölkə 2030-cu ilə qədər 50 min ehtiyat qüvvəyə malik olmağı planlaşdırır və bununla da onilliyin sonuna qədər ümumi təlim keçmiş qüvvələrin sayı hazırkı 275 min aktiv və mülki hərbi personal daxil olmaqla 330 minə çatdırılacaq.
Votren qeyd edib ki, digər modernləşdirmə səyləri müxtəlif növlər üzrə pilotsuz uçuş aparatı parkının genişləndirilməsinə və 2 500 kilometrdən çox məsafədəki hədəfləri vurmaq qabiliyyəti kimi xarakterizə etdiyi dərin zərbə imkanlarının artırılmasına yönələcək.
Yenilənmiş hərbi planlaşdırma qanunu 2026-2030-cu illər ərzində pilotsuz uçuş aparatları və raketlərin alınmasına 8,5 milyard avro ayrılmasını nəzərdə tutur. Votren bildirib ki, Fransa maraq göstərilən sadə FPV tipli pilotsuz uçuş aparatlarından Fransa əvvəllər 10 min ədəd sifariş edib və onların yarısının 2026-cı ilə qədər təhvil verilməsi gözlənilir, bu, daha iri və qabaqcıl sistemlərə qədər geniş spektri əhatə edir.
Paralel olaraq, ölkə “radioelektron mübarizə tüfənglərindən yük maşınına quraşdırılmış toplara və lazerlə yönəlmiş raketlərə qədər” müxtəlif vasitələri əhatə edən pilotsuz uçuş aparatlarına qarşı sistemlər üçün əlavə 1,6 milyard avro ayırmağı planlaşdırır.
Bununla əlaqədar olaraq, Fransanın satınalma agentliyi bu gün şirkətləri pilotsuz uçuş aparatlarını ələ keçirən sistemlərini sınaqdan keçirməyə dəvət edən yeni tender elan edib. Avropa İttifaqının satınalma portalı olan “Tenders Electronic Daily”də dərc edilən bildirişdə qeyd olunur ki, mövcud əks-pilotsuz texnologiyalar kifayət qədər deyil, çox bahalıdır və gələcək təhdidlərə uyğunlaşdırılmayıb. Hədəf kateqoriyası 100 kiloqramdan artıq çəkisi olan və saatda 600 kilometr sürətlə uçan pilotsuz uçuş aparatlarını əhatə edir.
Sevinc Əliyeva
Ordu.az
