Ordu.az xəbər verir ki, bu barədə Ermənistanın “Past” nəşri “Moskvadan xəbərdarlıq mesajı: Putin-Paşinyan danışıqlarının arxasında nə dayanır?” başlıqlı məqaləsində yazıb.
Nəşr qeyd edib ki, Ermənistan-Rusiya münasibətləri ölkənin xarici siyasətinin əsas istiqamətlərindən biri olaraq qalır və bu kontekstdə keçirilən yüksək səviyyəli danışıqlar təbii olaraq geniş ekspert müzakirələrinin mərkəzindədir. Mütəxəssislərin qiymətləndirməsinə görə, son görüş zamanı səsləndirilən mesajlar son dərəcə aydın idi və dolayı eyhamlardan deyil, birbaşa ifadə olunmuş gözləntilərdən və narahatlıqlardan ibarət idi.
“Paşinyanın Rusiya üçün nə siyasi, nə də iqtisadi sahədə real alternativi yoxdur. Eyni zamanda, Ermənistanın baş naziri öz niyyətlərinin səmimiliyini şübhə altına almaqda davam edir ki, bu da Rusiyada diqqətdən kənarda qala bilməzdi. Analitiklərin fikrincə, bu ikili yanaşma etimadın tədricən azalmasına gətirib çıxarır və bu, ikitərəfli münasibətlərin dərinliyinə və effektivliyinə təsir göstərə bilər.
Əgər Paşinyan bu davranışı davam etdirsə, Ermənistan Rusiya tərəfindən təklif olunan əlverişli şərtlərdən məhrum olmaq riski ilə üzləşir. Vladimir Putin Paşinyana açıq şəkildə çatdırdı ki, Ermənistanla əməkdaşlığa hazır olması dəyişməyib. Bununla belə, ekspertlər qeyd edirlər ki, baş nazirin addımları buna təsir göstərə bilər. Xatırladaq ki, bir halda Qərbin Ermənistanın daxili işlərinə müdaxiləsinə imkan verilir, amma Ermənistanın əsrlər boyu dostu olan ölkəyə yox...”, - deyə nəşr bildirib.
Müəllif yazıb ki, bu vəziyyətdə iqtisadi amil xüsusi əhəmiyyət kəsb edir. Mütəxəssislər hesab edirlər ki, Paşinyanın siyasi oyunları ilk növbədə Ermənistan vətəndaşlarının cibinə təsir edəcək. İqtisadi münasibətlərin mümkün pisləşməsi malların və xidmətlərin bahalaşmasına, investisiyaların azalmasına və ümumi sosial-iqtisadi vəziyyətin ağırlaşmasına səbəb ola bilər.
“Lakin eyni qiymətləndirmələrə görə, baş nazir istənilən vədlə və istənilən vasitə ilə daha çox vəzifəsini qorumaqla maraqlanır, vətəndaşlarının rifahı onu maraqlandırmır. Analitiklərin fikrincə, bu yanaşma idarəetmə böhranını dərinləşdirir və cəmiyyətin dövlət institutlarına inamını azaldır.
Paşinyan həm Moskva, həm də öz xalqı üçün ciddi yükə çevrilib və onların qarşısında yaşayış dəyərinin artması kimi “sürpriz” hazırlayır, halbuki əməkhaqları və insanların yaşamağa məcbur olduqları şərait aşağı səviyyədə qalır. Əgər Paşinyan Moskva ilə münasibətləri korlamaqda davam edərsə, bu, vətəndaşlara ağır zərbə vura bilər, çünki Ermənistanın alternativi yoxdur.
Bir çox ekspertlər danışıqların nəticəsini belə şərh edirlər: Moskvanın Paşinyana mesajı aydın idi: siz nə etdiyinizi anlamırsınız, yanlış yoldasınız və eyni şəkildə davam etsəniz, artıq vurduğunuz zərərdən qat-qat artıq zərər verəcəksiniz.
Nəticədə Ermənistanı hansı taleyin gözlədiyini demək hələ tezdir, lakin aydındır ki, mövcud şəraitdə əsas məsələ ölkənin xarici balansını qorumaqdır ki, Ermənistan regionda tək qalmasın”, - deyə məqalədə bildirilib.
Alpər Mövludoğlu
Ordu.az
