Ordu.az xəbər verir ki, bu barədə Ermənistanın xarici işlər naziri Ararat Mirzoyan bildirib.

“Hazırda Ermənistan və Türkiyə arasında kifayət qədər dinamik və perspektivli dialoq aparılır. İndi biz qarşılıqlı olaraq tələbələr üçün təqaüdlərin təsis edilməsi imkanını müzakirə edirik”, - deyə Mirzoyan Ermənistan parlamentinin xarici əlaqələr komissiyasının iclasında qeyd edib.

O, həmçinin vurğulayıb ki, Ermənistan və Türkiyə arasındakı dialoq diplomatik münasibətlərin qurulması və sərhədlərin tam açılması üçün kifayət qədər inkişaf səviyyəsinə çatıb.

“Ermənistan və Türkiyə arasındakı dialoq kifayət qədər yetkinləşib ki, cari proseslərlə yanaşı, tam nəticəyə, yəni iki ölkə arasında diplomatik münasibətlərin qurulmasına və sərhədlərin tam açılmasına gətirib çıxarsın. Buna heç bir şübhə yoxdur və biz eyni mesajı türkiyəli tərəfdaşlarımıza da çatdırırıq”, - deyə Mirzoyan bildirib.

Alpər Mövludoğlu
Ordu.az