Ordu.az xəbər verir ki, bu barədə “The Times of Israel” məlumat yayıb.

İsrail ordusu İrana qarşı əməliyyatların azı daha bir və ya iki həftə davam etməsini planlaşdırır və bu müddət ərzində İran rejiminin daha minlərlə hədəfinə zərbə endirməyi məqsəd qoyur.

İsrailin məqsədi İran rejiminin və onun hərbi obyektlərinin sistemli şəkildə zəiflədilməsidir.

Planlar İrana qarşı genişmiqyaslı bombardman kampaniyasının başlanmasından bir neçə gün sonra elan edilib.

Ordunun məlumatına görə, çərşənbə gününə olan vəziyyətə əsasən, münaqişənin başlanmasından bəri İsrail Hərbi Hava Qüvvələri İrana endirilən zərbələr zamanı 5000-dən çox bomba atıb.

Hərbi qurum əlavə edib ki, İsrail qırıcı təyyarələri “xüsusilə Tehran bölgəsinə diqqət yetirməklə İran üzərində hava üstünlüyünü daha da möhkəmləndirməyə davam edir”.

İsrail Hərbi Hava Qüvvələrinin yüksək rütbəli zabiti bildirib ki, İsrailin zərbələri minlərlə iranlı hərbçinin ölümünə səbəb olub.

“Son iki gün ərzində biz minlərlə iranlı qüvvəni məhv etmişik”, - deyə hərbçilərin yaydığı videoda yalnız ivrit əlifbasındakı ilk hərfi ilə təqdim edilən, “Ramat David” aviabazasının komandanı polkovnik “Alef” bildirib.

Aviabaza komandanı qeyd edib ki, o, Tehranın şərqində yerləşən iri İran hərbi kompleksinə endirilən zərbə dalğasında iştirak edib.

“Bombaları atmazdan bir neçə saniyə əvvəl sağa və sola baxdım və yanımda onlarla qırıcı təyyarə gördüm. Onlar sərbəst uçur, yüzlərlə ton yüksək dəqiqlikli sursat atır və hədəfləri məhv edirlər”, - deyə o qeyd edib.

Sevinc Əliyeva
Ordu.az