Ordu.az xəbər verir ki, bu barədə Ermənistanın “Politik.am” nəşri yazıb.

“Etibarlı mənbələrimizin məlumatına görə, ötən ilin sonunda təşkilat tərəfindən keçirilmiş son genişmiqyaslı sorğunun nəticələri hakimiyyətin Qərbdəki koordinatorları arasında ciddi çaşqınlıq yaradıb.

Sorğunun nəticələri sifarişçilər üçün gözlənilməz olub və Nikol Paşinyana olan etimadın fəlakətli dərəcədə azaldığını göstərib. Mənbənin sözlərinə görə, son bir ildə müxtəlif təbliğat fəallıqlarına baxmayaraq, onun reytinqi demək olar ki, artmayıb və hakimiyyət üçün katastrofik dərəcədə aşağı səviyyədə qalıb, antireytinq isə mütləq həddə çatıb. Diqqətçəkən məqam odur ki, hətta Robert Köçəryan və ya Samvel Karapetyan kimi əsas müxalif fiqurların seçkilərdə iştirak etmədiyi ssenari modelləşdirildikdə belə, respondentlərin böyük əksəriyyəti heç bir halda hazırkı baş nazirə səs verməyəcəyini bildirib”, - deyə nəşr qeyd edib.

KİV bildirib ki, “qərbyönlü vektor”un legitimliyini sual altına alan belə mənfi nəticələr xüsusilə ABŞ-nin vitse-prezidenti Cey Di Vensin regiona son səfəri fonunda ABŞ tərəfi üçün son dərəcə arzuolunmaz idi.

“Buna görə də, nə etmək mümkün olduğunu anlayana qədər real rəqəmləri dərc etməmək qərarı verilib.

Mənbəmiz bildirir ki, son vaxtlar həmin hesabat “redaktə” olunub: rəqəmlər süni şəkildə şişirdilərək Paşinyan “keçici lider” kimi təqdim olunub və guya rəqiblərini “bir neçə dəfə” qabaqlayır. Belə “artımın” əsaslandırılması üçün təbliğat sahəsində Vensin səfərinin və vəd olunan investisiya proqramlarının media effekti istifadə olunacaq.

Belə saxtalaşdırmanın məqsədi aydındır: əhali arasında ümidsizlik hissi yaratmaq. “Onsuz da o qalib gələcək” tezisi kütləvi laqeydlik və vətəndaşların seçkilərdə iştirak etməməsi ilə nəticələnməlidir ki, bu da hakimiyyətə minimal dəstək şəraitində belə mövqelərini qorumağa imkan versin”, - deyə nəşr bildirib.

Alpər Mövludoğlu
Ordu.az