Ordu.az xəbər verir ki, iki şirkətin birgə həyata keçirdiyi orta sinif pilotsuz uçuş aparatı proqramı çərçivəsində ilk hava vasitələrinin montaj və istehsal prosesinin aprel ayında tamamlanacağı bildirilib.
“Leonardo”nun baş icraçı direktoru Roberto Cinqolani şirkətin 2025-ci il maliyyə nəticələrinin qiymətləndirildiyi investor və mətbuat konfransında pilotsuz uçuş aparatı proqramına dair strateji təfərrüatları bölüşüb.
Cinqolani pilotsuz uçuş aparatı seqmentində “fövqəladə dinamika” əldə etdiklərini vurğulayaraq, “Baykar” ilə aparılan işlərdə qrafikdən bir qədər irəlidə olduqlarını bildirib.
Cəmi səkkiz ay kimi qısa müddətdə böyük irəliləyiş əldə etdiklərini qeyd edən baş icraçı direktor, İtaliyanın şimalında yerləşən “Ronchi dei Legionari” müəssisəsində ilk orta sinfə məxsus pilotsuz uçuş aparatlarının montaj xəttindən çıxması üçün aprel ayını göstərib.
Yalnız sabitqanadlı deyil: fırlanan qanadlı platformalar da yoldadır
Əməkdaşlığın əhatə dairəsi yalnız klassik pilotsuz uçuş aparatı platformaları ilə məhdudlaşmır. Cinqolani aparılan işlərin həm sabitqanadlı vasitələri, həm də fırlanan qanadlı (insansız helikopter) platformaları əhatə edən geniş məhsul çeşidinə malik olduğunu açıqlayıb.
“Baykar”ın əməliyyat təcrübəsi ilə “Leonardo”nun texnoloji bazasını birləşdirən layihədə gündəlik əsasda mühəndislik inteqrasiyası davam edir. İki həftə sonra açıqlanacaq yeni strateji plan yeniləməsi ilə layihəyə dair texniki detalların daha da dəqiqləşəcəyi gözlənilir. İki şirkət qısa müddət əvvəl “LBA Systems” adlı birgə müəssisəni də təsis edib.
Sürü əməliyyatı və sınaq prosesi
Seriyalı istehsal və qlobal satış mərhələsinə keçməzdən əvvəl təxminən bir illik intensiv sınaq və nümayiş prosesi nəzərdə tutulur. Qarşıdakı aylarda keçiriləcək sınaqlarda aşağıdakı qabiliyyətlər nümayiş etdiriləcək:
Xüsusi şəraitdə enmə/qalxma: çətin coğrafi və meteoroloji şərtlərdə əməliyyat effektivliyi.
Sürü əməliyyat qabiliyyəti: birdən çox pilotsuz uçuş aparatının vahid mərkəzdən inteqrasiya olunmuş idarə olunması.
Yeni nəsil texnologiyalar: tamamilə yeni texnologiyaların platforma üzərində performans təhlili.
Qlobal layihələrlə inteqrasiya
Pilotsuz uçuş aparatı proqramındakı irəliləyişin “Leonardo”nun iştirak etdiyi “Global Combat Air Programme” kimi iri müdafiə layihələri ilə də sinerji yaratması hədəflənir. Türk və italyan mühəndislərin ortaq baxışla inkişaf etdirdiyi bu platformalar Avropa müdafiə bazarında “oyun dəyişdirici” amil kimi qiymətləndirilir.
Cinqolani yatırımların planlaşdırılan səviyyədə davam etdiyini və layihənin elektronika bölməsinə təsirinin qısa müddətdə hiss olunacağını bildirərək çıxışını yekunlaşdırıb.
Sevinc Əliyeva
Ordu.az
