Ordu.az xəbər verir ki, bunu Ermənistan parlamentinin sədri Alen Simonyan “Dojd” telekanalına müsahibəsində Gümrüdə yerləşən Rusiya hərbi bazasının Ermənistanın maraqlarına uyğun olub-olmaması məsələsinə toxunarkən deyib.
O qeyd edib ki, Ermənistan rusiyalı tərəfdaşlardan hava limanını və Ermənistan-Azərbaycan sərhədini qoruduqları bir neçə məntəqəni tərk etmələrini xahiş edib.
“Biz bunu məqsədəuyğun hesab etdik. Nə vaxt və ya əgər məqsədəuyğun saysaq, bu söhbətə başlayacağıq. Amma hazırda bunu müzakirə etmirik. Çünki gəlin anlayaq, xəritəyə baxaq, Ermənistan harada yerləşir və hansı çağırışlarla üz-üzədir. Mən demirəm ki, Rusiya hərbi bazası hər şeyə yüz faiz təminatdır. Amma məsələn, bizim regionda, xüsusilə də indiki vəziyyətdə gərginliyi artırmaq və çox kəskin addımlar atmaq yanlışdır. Ola bilər ki, bu, yaxşı səslənsin, amma real siyasətdə (real politics) bu, əslində belə deyil”, - deyə Simonyan qeyd edib.
Moskva ilə münasibətlərə gəlincə, erməni parlament sədrinin sözlərinə görə, bu münasibətlər Ermənistanın maraqlarına uyğun səviyyədə olub və olacaq.
“İstəyirəm ki, bu aydın olsun: Moskvada dediklərim Ermənistanın seçdiyi siyasətdir. Biz bir qütbdən digərinə sıçramaq niyyətində deyilik. Bizim üçün (siz asılılıqdan danışdınız) asılılıqdan çıxmağın birinci mərhələsi 2018-ci ildən etibarən Ermənistanda ədalətli və şəffaf seçkilərin keçirilməsidir ki, bu seçkilər heç kimdə, hətta uduzan və ya bəzi şəhərlərdə qalib gələn müxalifətdə belə şübhə doğurmur. Yəni bu, asılılıqdan uzaqlaşmağın ilk addımıdır”, - deyə Simonyan bildirib.
O, həmçinin qeyd edib: “2018-ci ildən sonra artıq bizi oradan təyin etmirlər, çünki inqilabdan əvvəl hər şeyin daimi şəkildə razılaşdırıldığına dair şübhələrim var.
Xarici siyasət “Ermənistana nə sərf edirsə, elə də davranacağıq” prinsipi ilə həyata keçirilir. Təbii ki, razılaşmalar var, bütün ölkələrlə qarşılıqlı fəaliyyət var və istər Vens olsun, istər ABŞ, istər Fransa, istərsə də Avropa İttifaqı olsun, Rusiya ilə siyasəti də balanslaşdıracağıq. Prinsip budur”.
Alpər Mövludoğlu
Ordu.az
