Ordu.az xəbər verir ki, bu barədə xarici KİV-lər məlumat yayıb.

Məlumata görə, ABŞ administrasiyası diplomatik, iqtisadi və təhlükəsizlik sahəsində əməkdaşlıq kanalları vasitəsilə Yaponiyaya təzyiq edir.

Vaşinqton Yaponiyanın GCAP proqramı vasitəsilə ABŞ-dən ənənəvi müdafiə texnologiyası asılılığından uzaqlaşmasından narahatdır.

İkinci Dünya müharibəsindən sonra Yaponiya öz hava qüvvələrini əsasən ABŞ dizaynları və texnologiyaları ilə formalaşdırıb. Lakin 2020-ci ildə Yaponiya hökuməti bu asılılığa son qoyacağını açıqlayıb və F-2 döyüş təyyarələrini əvəz etmək üçün yerli FX proqramını işə salıb. Bu addım 2022-ci ildə Britaniya və İtaliya ilə GCAP-ın birgə hazırlanması sazişi ilə gücləndirilib.

İsrail kəşfiyyat xidmətləri də GCAP proqramını diqqətlə izləyir. Səbəb Səudiyyə Ərəbistanının layihədə mümkün iştirakıdır. 2023-cü ilin martında Ər-Riyad hökuməti proqramda iştirak etmək niyyəti haqqında bəyannamə imzalayıb. 2024-cü ilin noyabrında İtaliyanın xarici işlər naziri ictimaiyyətə Səudiyyə Ərəbistanının layihəyə daxil ola biləcəyini açıqlayıb.

Bu hadisələrdən sonra İsrail tərəfi Yaponiyaya təzyiqlərini artırmağa başlayıb. Lakin mənbələr İsrail təzyiqinin mahiyyəti ilə bağlı təfərrüatlı məlumat vermir.

Sevinc Əliyeva
Ordu.az