Ordu.az xəbər verir ki, işğalçı ordunun hərbi qulluqçusu Mardir Vaskanyan xidmət yoldaşları tərəfindən vəhşicəsinə döyülüb. Hadisəni hüquq-mühafizə orqanlarından gizlətmək məqsədilə xəsarət alan əsgər M.Vaskanyan hərbi hissənin tibb məntəqəsinə göndərilib.
Hərbi qulluqçunun vəziyyətinin və travmasının ağır olduğunu təsbit edən hərbi hissənin həkimi Ermənistan ordusunun döyülən əsgərini müalicə etməkdən imtina edib. Hərbi qulluqçunun sağlamlığında ortaya çıxa biləcək fəsadlara görə məsuliyyəti öz üzərinə götürməkdən boyun qaçıran hərbi həkim M.Vaskanyanın təcili Xankəndinə hərbi hospitala təxliyə edilməsinə qərar verib. Onun bu addımı nəticəsində komandanlıqla yaranan münaqişə və hədə-qorxulara baxmayaraq həkim qərarından vaz keçməyib.
Əsgəri hospitala göndərdikdən sonra həkim hərbi polisə də məlumat verib.
Hadisə ilə bağlı açılan cinayət işi hərbi polis tərəfindən araşdırılır.
Ordu.az
