Ordu.az xəbər verir ki, bu barədə Ermənistanın “Past” nəşri “Avropa seçiminin qiyməti: Ermənistan əsas ixrac və əmək bazarlarını itirə bilər” başlıqlı məqaləsində yazıb.

Nəşr qeyd edir ki, Ermənistanın Avropa İttifaqı ilə münasibətlərinin inkişaf perspektivləri fonunda növbəti xəbərdarlıq Rusiyanın xarici işlər nazirinin müavini Mixail Qaluzin tərəfindən səsləndirilib.

Qaluzinin fikrincə, əgər Ermənistan gələcəkdə Avropa İttifaqına üzv olmaq qərarı versə, bu halda ölkə əsas ixrac bazarlarını itirmək və əmək miqrasiyası sahəsində ciddi məhdudiyyətlərlə üzləşmək riski daşıyır.

“Ermənistan iqtisadiyyatının bir çox sahələri uzun illər ərzində erməni məhsullarının daha əlverişli və rəqabətqabiliyyətli şərtlərlə satıldığı iqtisadi məkanla sıx bağlı olaraq qalır. Bu əlaqələrin qırılması yerli istehsalçılar üçün ciddi problemlər yarada bilər”, - deyə nəşr Qaluzinin mövqeyini təqdim edib.

Məqalədə bildirilir ki, rusiyalı diplomat Ermənistan ixracatının əhəmiyyətli hissəsinin uzun illər ərzində formalaşmış iqtisadi əlaqələrə malik bazarlara yönəldiyini vurğulayıb.

“Bu bazarların itirilməsi yerli istehsalçıların fəaliyyətinə ciddi təsir göstərə bilər. Yeni bazarların tapılması və mövcud ixrac həcmlərinin bərpası həm uzun zaman, həm də böyük maliyyə və təşkilati resurslar tələb edəcək”, - deyə Qaluzin bildirib.

Nəşr onun əmək miqrasiyası ilə bağlı fikirlərinə də geniş yer ayırıb.

“Minlərlə Ermənistan vətəndaşı xarici ölkələrdə çalışır və öz ailələri üçün mühüm gəlir mənbəyi formalaşdırır. Mövcud şərtlərin dəyişməsi həm məşğulluq imkanlarına, həm də ölkəyə daxil olan pul köçürmələrinin həcminə təsir göstərə bilər”, - deyə rusiyalı rəsmi qeyd edib.

“Past” yazır ki, iqtisadçılar arasında bu məsələyə münasibət birmənalı deyil. Bir qrup mütəxəssis hesab edir ki, Ermənistan iqtisadiyyatı uzun illər ərzində mövcud iqtisadi əlaqələr sistemi əsasında formalaşıb və hər hansı kəskin dəyişiklik keçid dövründə ciddi çətinliklər yarada bilər.

“Digər ekspertlər isə yeni bazarların və iqtisadi tərəfdaşların axtarılmasının uzunmüddətli perspektivdə ölkə üçün əlavə inkişaf imkanları açacağına inanırlar.

Bununla belə, siyasi qiymətləndirmələrdən asılı olmayaraq, əksər mütəxəssislər bir məsələdə həmfikirdirlər. Ermənistan üçün əsas prioritet iqtisadi risklərin hərtərəfli hesablanması olmalıdır. İxrac həcmləri, investisiya mühiti, iş yerlərinin qorunması və sosial sabitlik ölkənin gələcək inkişafına birbaşa təsir göstərə biləcək amillərdir”, - deyə nəşr vurğulayıb.

Məqalədə qeyd olunur ki, Ermənistanın xarici siyasət seçimi ətrafında gedən müzakirələr artıq təkcə siyasi deyil, həm də iqtisadi gündəliyin ən mühüm mövzularından birinə çevrilib.

“Bu mövzuda səsləndirilən açıqlamalar göstərir ki, Ermənistanın gələcək inkişaf istiqaməti ilə bağlı debatlar hələ uzun müddət ictimai diqqət mərkəzində qalacaq”, - deyə “Past” nəşri qeyd edib.

Alpər Mövludoğlu
Ordu.az