Ordu.az xəbər verir ki, bu barədə “Exilenova+” icması məlumat yayıb.
Ukrayna Silahlı Qüvvələrinin Baş Qərargahı bildirib ki, zərbə 22 iyun tarixində, Moskva vilayətində yerləşən Dubna Kosmik Rabitə Mərkəzinə hücumla eyni gündə həyata keçirilib.
Peyk görüntüləri Baş Qərargahın açıqlamasını təsdiqləyərək kompleksin 25 metrlik parabolik əsas antenasının, həmçinin Əsas Aparat-Proqram Kompleksi binasının damında yerləşən antenanın kritik zədələndiyini göstərir.
Məlumata görə, Əsas Aparat-Proqram Kompleksi binasının mərkəzi hissəsi də ciddi zərər görüb. Həmin hissədə peyk modemləri, multipleks otaqları və digər kosmik mərkəzlərə çəkilmiş fiber-optik rabitə xətlərinin qoşulduğu mərkəzi kommutasiya qovşağı yerləşir.
Aparat-Texniki Bina №1 də ciddi zədələnib. Bu binada ötürücü və qəbuledici komplekslər, antena stansiyasının kabel marşrutlarının mərkəzi kommutasiya sistemi, eləcə də ötürücülərin və əsas antenanın elektron avadanlıqlarının soyutma sistemləri yerləşir.
Vladimir Kosmik Rabitə Mərkəzi Rusiyanın dövlətə məxsus “Kosmik Rabitə” müəssisəsinin idarə etdiyi beş əsas teleportdan biridir. Digər mərkəzlər Dubna, Medvejye Ozyora, Skolkovo və Xabarovskda yerləşir.
Mərkəzin texniki imkanları və coğrafi mövqeyi 20° qərb uzunluğundan 103° şərq uzunluğuna qədər peyk rabitə kanallarının yaradılmasına, həmçinin Rusiyanın peyk rabitə sistemləri və kosmik aparatlarının idarə edilməsinə imkan verir.
Mərkəz 1971-ci ildə SSRİ Rabitə Nazirliyinin əmri ilə istismara verilib. Onun əsas vəzifələri Uzaq Şərqə radio və televiziya proqramlarının, magistral telefon xətlərinin ötürülməsi, eləcə də Kuba ilə telefon əlaqəsinin təmin edilməsi olub.
1995-ci ildə burada “Kaştan” komanda-ölçmə kompleksi istifadəyə verilib. Kompleks “Express-A”, “Express-AM” və “Sesat” seriyalı kosmik aparatlarla telemetriya və komanda məlumatlarının mübadiləsini, həmçinin onların idarə olunmasını təmin edir.
“Express” seriyalı peyklər rəqəmsal televiziya və radio yayımı, telefon rabitəsi, videokonfrans, məlumat ötürülməsi, internetə çıxış, VSAT şəbəkələrinin yaradılması və dövlət strukturları, o cümlədən prezident rabitəsi üçün istifadə olunur.
2009-2015-ci illərdə mərkəzin infrastrukturu, o cümlədən rabitə avadanlıqları tam modernləşdirilib. Bunun nəticəsində əməliyyat etibarlılığı artırılıb və istismar xərcləri optimallaşdırılıb.
Sevinc Əliyeva
Ordu.az
