Ordu.az xəbər verir ki, bu barədə “Tasnim” agentliyi məlumat yayıb.

İran agentliyinin mənbələrinin bildirdiyinə görə, səfər danışıqlar təşəbbüslərinin hazırkı vəziyyətinin və gələcək razılaşmaların mümkün parametrlərinin müzakirəsinə həsr olunub.

Bundan əvvəl Qətər Xarici İşlər Nazirliyinin nümayəndəsi də qarşılıqlı anlaşma memorandumu layihəsi ilə bağlı məsləhətləşmələr aparmaq üçün Tehrana səfər etmişdi. Tərəflərin fikrincə, həmin sənəd bir sıra regional və beynəlxalq məsələlərin həlli üçün mümkün əsas kimi nəzərdən keçirilir.

İran tərəfi diplomatik təmasları daha geniş danışıqlar prosesinin tərkib hissəsi kimi qiymətləndirir. İranın xarici işlər naziri Abbas Əraqçi bildirib ki, Tehran və Vaşinqton yaxın günlərdə ilkin qarşılıqlı anlaşma barədə elan verə bilərlər.

Bununla yanaşı, o vurğulayıb ki, yekun razılaşma hələ əldə olunmayıb.

“Diplomatiya İranın strateji nailiyyətlərini möhkəmləndirmək üçün vasitə kimi istifadə olunur”, - deyə Əraqçi bildirib.

Onun sözlərinə görə, hazırda 14 maddədən ibarət qarşılıqlı anlaşma memorandumu layihəsi müzakirə olunur.

Əraqçi qeyd edib ki, təklif olunan format iki mərhələdən ibarətdir: ilkin anlaşma memorandumu və daha sonra mümkün yekun sazişlə bağlı danışıqlar.

Təxminən 60 gün davam edə biləcək ikinci mərhələdə sanksiyaların ləğvi, nüvə proqramı, uranın zənginləşdirilməsi, iqtisadi bərpa və digər həssas mövzuların müzakirəsi nəzərdə tutulur.

İranlı nazir həmçinin “icrası təmin edilə bilən zəmanətlərin” vacibliyini vurğulayaraq, əvvəlki razılaşmaların yerinə yetirilməməsi təcrübəsini xatırladıb və gələcəkdə oxşar halların qarşısını almaq üçün mexanizmlərin yaradılmasının zəruriliyini qeyd edib.

O bildirib ki, İranın diplomatik və müdafiə strukturları milli maraqların qorunması üçün koordinasiyalı şəkildə fəaliyyət göstərirlər.

Əraqçinin sözlərinə görə, gələcəkdə əldə ediləcək istənilən razılaşma qarşılıqlı suverenliyə hörmət və təzyiq siyasətindən imtina prinsipləri əsasında qurulmalıdır.

Sevinc Əliyeva
Ordu.az