Ordu.az xəbər verir ki, bu barədə “X” sosial şəbəkəsində “Status-6” (War & Military News) hesabı paylaşım edib.
Məlumata görə, “United Aircraft Corporation” tərəfindən istehsal edilən “Su-34E” təyyarələrinin ilk partiyası Əlcəzair Hərbi Hava Qüvvələrinin inventarına daxil edilmək üçün ölkəyə təhvil verilib.
İddialara əsasən, təyyarələr ölkənin şimal hissəsində yerləşən Mulay Əhməd Mədəqri hava limanına eniş edib. Strateji mövqeyi və logistika imkanları ilə seçilən bu baza Əlcəzair Hərbi Hava Qüvvələrinin modernizasiya proqramında mühüm rol oynayır.
Sosial mediada yayılan görüntülərin həmin hava limanında çəkildiyi bildirilir və onların Əlcəzairə çatdırılmış “Su-34E” təyyarələrini əks etdirdiyi iddia olunur.
“United24 Media” tərəfindən aparılan təhlilə görə, bu tədarük Rusiya ilə Əlcəzair arasında uzun müddətdir gözlənilən müdafiə ixracı müqavilələrinin icrasında irəliləyiş olduğunu göstərir.
Məlumata əsasən, 2019-cu ilin dekabrında Əlcəzairin müdafiə mənbələri 14 ədəd “Su-34ME”, 14 ədəd “Su-57E” və 14 ədəd “Su-35E” olmaqla ümumilikdə 42 təyyarədən ibarət paket müqavilənin bağlandığını açıqlamışdı. Həmin vaxt təhvil prosesinin 2025-ci ilədək tamamlanacağı planlaşdırılırdı.
Lakin Rusiya-Ukrayna müharibəsi nəticəsində yaranan itkilər və Moskvanın öz Hərbi Hava Qüvvələrinin döyüş qabiliyyətini qorumaq zərurəti bu qrafikin əhəmiyyətli dərəcədə gecikməsinə səbəb olub.
Prosesin praktiki əlamətləri isə son aylarda daha aydın görünməyə başlayıb. 2025-ci ilin avqust ayında Moskva yaxınlığındakı Jukovski hava limanında Rusiya Hava-Kosmik Qüvvələrinin standart kamuflyaj sxemindən fərqlənən, səhra rənglərinə boyanmış “Su-34E” təyyarəsi görüntülənmişdi.
Həmin görüntülər Rusiyanın ixrac öhdəliklərini yerinə yetirmək mərhələsinə keçdiyi barədə fikirləri gücləndirmişdi.
Ekspertlər hesab edirlər ki, bu təhvilin reallaşması Əlcəzairin regionda uzaqmənzilli zərbə və çoxməqsədli əməliyyat imkanlarını əhəmiyyətli dərəcədə artıracaq.
Rusiya isə mövcud müharibə şəraitində həm ixrac gəlirlərini qorumağa, həm də Əlcəzair kimi strateji tərəfdaşlarla müdafiə əməkdaşlığını davam etdirməyə çalışır.
Sevinc Əliyeva
Ordu.az
