Ordu.az xəbər verir ki, Heqset bu barədə “X” sosial şəbəkəsində paylaşım edib.

“Üç ay əvvəl ABŞ Müdafiə Nazirliyi “Anthropic”i öz binasından birdəfəlik uzaqlaşdırdı. Hər yeni gün bunun düzgün qərar olduğunu sübut edir”, - deyə o yazıb.

Əməkdaşlığın dayandırılması ilə bağlı rəsmi təfərrüatlar açıqlanmayıb.

Daha əvvəl “Anthropic” ABŞ tənzimləyici qurumları ilə ayrıca mübahisənin mərkəzinə düşmüşdü. Şirkət süni zəkanın yeni “Fable 5” və “Mythos 5” modellərinə çıxışı müvəqqəti olaraq dayandırmışdı.

“NBC News”un məlumatına görə, şirkət milli təhlükəsizlik məsələləri ilə əlaqədar ABŞ hökumətindən göstəriş aldıqdan sonra modellərin fəaliyyətini məhdudlaşdırmağa məcbur olub.

ABŞ Ticarət Nazirliyinin göndərdiyi sənəddə sistemlərə çıxışın bütün xarici vətəndaşlar, o cümlədən ABŞ ərazisində yaşayan şəxslər və şirkətin xarici əməkdaşları üçün məhdudlaşdırılması tələb olunub.

Nəticədə “Anthropic” bütün istifadəçilər üçün modelləri deaktiv edib və bunu tənzimləyicilərin tələblərini yerinə yetirməyin yeganə yolu adlandırıb.

Şirkət bildirib ki, məsələ hakimiyyət orqanlarının fikrincə, təhlükəsizlik mexanizmlərinin yan keçilməsinə imkan yarada biləcək mümkün zəifliklə bağlıdır.

Bununla yanaşı, “Anthropic” hökumətin mövqeyi ilə razılaşmadığını açıqlayıb. Şirkət hesab edir ki, potensial zəiflik səbəbindən yüz milyonlarla insanın istifadə etdiyi kommersiya məhsulunun geri çağırılması düzgün addım deyil.

Şirkət həmçinin qeyd edib ki, məsələ ilə bağlı yalnız şifahi bildirişlər alıb və oxşar zəifliklərin digər süni zəka tərtibatçılarında da mövcud ola biləcəyini ehtimal edir.

“Anthropic” qərarın yenidən nəzərdən keçiriləcəyinə və modellərə çıxışın bərpa olunacağına ümid etdiyini bildirib.

Sevinc Əliyeva
Ordu.az