Ordu.az xəbər verir ki, bu barədə İsrail KİV-lərində dərc olunan məqalələrdə bildirilib.

“Maariv” qəzetinin köşə yazarı Ben Kaspit yazıb ki, İsrailin Baş naziri Benyamin Netanyahu onun fikrincə, HƏMAS, “Hizbullah” və İranla qarşıdurmalarda taktiki uğurlar əldə etsə də, daha geniş siyasi mübarizədə məğlub olub.

“Son illərdə HƏMAS, “Hizbullah” və İran üzərində əldə etdiyimiz hərbi qələbələrdən daha güclü olan yeganə hadisə, onların ardınca üzləşdiyimiz siyasi məğlubiyyətdir”, - deyə o qeyd edib.

“Maariv”in digər analitiki Avi Aşkenazi isə İsrailin ehtimal olunan razılaşmanın formalaşmasına təsir göstərə bilmədiyini bildirib. Onun fikrincə, bu vəziyyət ölkənin siyasi rəhbərliyinin kifayət qədər effektiv olmaması ilə bağlıdır.

“Ynet” nəşri də İsrail rəsmiləri arasında danışıqların gedişinə təsir imkanlarının olmaması ilə bağlı narahatlığın artdığını yazıb. Yüksəkvəzifəli rəsmilərdən biri mümkün sazişi “pis razılaşma” adlandırıb.

“Haaretz” qəzetində dərc olunan məqalədə analitik Tsvi Barel qeyd edib ki, İran danışıqlara güclü mövqedən yanaşıb və regional, eləcə də qlobal proseslərə təsir göstərən iqtisadi və strateji təzyiq alətlərindən istifadə edib.

Onun qiymətləndirməsinə görə, Tehran artıq yalnız sağ qalmaq məntiqi ilə deyil, həm də təsir imkanlarını artıran regional güc kimi fəaliyyət göstərir.

Sevinc Əliyeva
Ordu.az