Ordu.az xəbər verir ki, bu barədə “Axios” məlumat yayıb.
Məlumata görə, sənəd atəşkəs rejiminin daha 60 gün müddətinə uzadılmasını, Hörmüz boğazında sərbəst gəmiçiliyin bərpasını və İranın nüvə proqramı ətrafında danışıqların başlanmasını nəzərdə tutur.
Mənbələrin bildirdiyinə görə, proses Pakistan, Qətər, Misir və Türkiyənin vasitəçiliyi ilə təxminən üç ay davam edən danışıqların nəticəsi olub.
Gözlənilir ki, sənəd regiondakı hərbi əməliyyatlara rəsmi şəkildə son qoyacaq və qlobal enerji bazarlarının sabitləşməsinə töhfə verəcək.
Pakistanın Baş naziri Şahbaz Şərif daha əvvəl tərəflərin “heç vaxt olmadığı qədər sülh sazişinə yaxın olduqlarını” bildirib. O qeyd edib ki, yekun razılaşma yaxın 24 saat ərzində əldə oluna və daha sonra elektron imzalanma ilə rəsmiləşdirilə bilər.
Bunun ardınca Pakistan Xarici İşlər Nazirliyi imzalanmanın virtual mərasiminin bazar gününə təyin olunduğunu təsdiqləyib.
ABŞ Prezidenti Donald Tramp isə “Truth Social” platformasında paylaşım edərək “sazişin sabah imzalanacağını” yazıb. O bildirib ki, bundan sonra Hörmüz boğazı “hamı üçün açıq olacaq” və İranla münasibətlər əvvəlki administrasiyalar dövründəkindən daha yaxşı səviyyədədir.
Tramp həmçinin vurğulayıb ki, razılaşmanın baş tutmaması halında ABŞ hərbi gücdən istifadə etmək imkanını özündə saxlayır.
ABŞ Prezidenti ayrıca qeyd edib ki, vəziyyət sabitləşdikdən sonra ABŞ B-2 bombardmançı təyyarələrinin iştirakı ilə İranın nüvə obyektlərini “aşkarlamaq və məhv etmək” niyyətindədir. Onun sözlərinə görə, bu proses həm İran ərazisində, həm də ABŞ-də həyata keçirilə bilər.
Mənbələr bildiriblər ki, imzalanmanın virtual formatda keçirilməsi logistik səbəblərlə əlaqədardır. Buna səbəb danışıqlar qrupunun Fransada keçiriləcək G7 sammiti öncəsi vaxtında ABŞ-yə qayıda bilməməsidir.
Məlumata görə, saziş mövzusu G7 sammiti çərçivəsində Trampın Misir, Qətər və BƏƏ liderləri ilə görüşlərinin əsas gündəm mövzularından biri olacaq. Tərəflər həmçinin regional tərəfdaşlarla müzakirələr aparacaq və Hörmüz boğazı bölgəsində gəmiçiliyin təhlükəsizliyinin təmin olunması məsələsini nəzərdən keçirəcəklər.
Sevinc Əliyeva
Ordu.az
