Ordu.az xəbər verir ki, şirkət sərgidə “INKAS Modular Light Tactical Vehicle” (MLTV) yüngül taktiki maşınını və INKAS ANURI antidron sistemini təqdim edib.

Məlumata görə, sübut edilmiş OEM platforması əsasında hazırlanan MLTV modul arxitekturaya malikdir və müxtəlif əməliyyat tələblərinə uyğun olaraq qısa müddətdə yenidən konfiqurasiya edilə bilir.

Maşın zirehli şəxsi heyət daşınması, kəşfiyyat, tibbi təxliyə, hücum və axtarış-xilasetmə əməliyyatları daxil olmaqla geniş tapşırıqlar spektri üçün nəzərdə tutulub.

Platformanın əsas üstünlüklərindən biri əlavə modul zireh mühafizə sistemidir. Bu sistem sayəsində maşının dayanıqlığını artırmaq üçün əsas konstruksiyada ciddi dəyişikliklərə ehtiyac qalmır.

Şirkətin baş icraçı direktoru David Xazanski bildirib ki, mövcud yüngül hərbi maşınlar müasir təhdidlərə qarşı kifayət qədər mühafizə təmin etmir və yüksək istismar xərcləri yaradır.

Sərgidə təqdim olunan digər yenilik ANURI süni zəka dəstəkli antidron sistemi olub. Məlumata görə, sistem saatda 400 kilometr sürətlə hərəkət edən pilotsuz uçuş aparatlarını məhv etmək qabiliyyətinə malikdir. ANURI hava hədəflərini 5 kilometrədək məsafədə aşkarlaya, izləyə və təxminən 80 saniyə ərzində zərərsizləşdirə bilir.

Sistem GNSS siqnallarının qarışdırıldığı şəraitdə də fəaliyyət göstərə bilir. Bunun üçün atalət naviqasiya sistemi və süni zəka dəstəkli vizual terminal tuşlama texnologiyalarından istifadə olunur.

Bildirilir ki, platforma həm operator tərəfindən birbaşa idarə oluna, həm də süni zəka dəstəkli yönləndirmə rejimində işləyə bilir. Sistem əl ilə və ya nəqliyyat vasitəsi üzərindən qısa müddətdə yerləşdirilə bilir.

Sevinc Əliyeva
Ordu.az