Ordu.az xəbər verir ki, bu barədə “Associated Press” agentliyi müdafiə qurumundakı mənbələrə istinadən məlumat yayıb.

Məlumata görə, Ağ Evin qərarsız mövqeyi hərbi planlaşdırmanı pozur və vergi ödəyicilərinə milyonlarla dollara başa gəlir.

NATO müttəfiqləri may ayında Trampın Polşaya 5 min ABŞ hərbçisinin göndəriləcəyini açıqlamasından sonra çaşqınlıq yaşayıblar. Bu bəyanat Avropadan eyni sayda hərbçinin çıxarılması barədə göstərişdən cəmi bir neçə həftə sonra səsləndirilib.

Ağ Ev isə qoşun sayının azaldılması planının daha əvvəl hazırlandığını iddia edir.

Agentliyin məlumatına görə, Tramp Polşaya qoşun göndərilməsi barədə sosial şəbəkələrdə paylaşım etdiyi gün Pentaqon həmin istiqamətə planlaşdırılmış bölmələrin rotasiyasını rəsmi olaraq ləğv edib.

ABŞ Ordusunun 1-ci Süvari Diviziyasının 2-ci Zirehli Briqada Döyüş Qrupuna məxsus texnika artıq yolda olub və bu daşınma ABŞ Nəqliyyat Komandanlığına 32 milyon dollara başa gəlib.

Kəskin qərar dəyişiklikləri səbəbindən hərbçilər Prezidentin bəyanatlarına uyğun olaraq planları sonradan yenidən tənzimləməyə məcbur qalırlar.

Qeyd olunur ki, bu vəziyyət yalnız Avropadakı müttəfiqləri narahat etmir, eyni zamanda səfərə az qalmış rotasiyaları ləğv edilən ABŞ hərbçilərinin döyüş ruhuna da mənfi təsir göstərir.

Bundan əlavə, ABŞ Ordusu Meksika sərhədindəki əməliyyatlar, Milli Qvardiyanın missiyaları və İran ətrafındakı müharibə səbəbindən 2-6 milyard dollar həcmində büdcə kəsiri ilə üzləşib.

Maliyyə çatışmazlığı səbəbindən ordu artıq ölkə üzrə hazırlıq proqramlarını və Avropadakı qeyri-döyüş təlimlərinin xərclərini azaltmağa başlayıb.

Sevinc Əliyeva
Ordu.az