Ordu.az xəbər verir ki, ümumi dəyəri 3,52 milyard dollar olan proqram xüsusilə Hind-Sakit okean bölgəsində uzaqmənzilli hava əməliyyatlarını dəstəkləmək və yüksək intensivlikli münaqişə ssenarilərində ABŞ-nin hava gücü proyeksiyası imkanlarını artırmaq məqsədi daşıyır.
Pentaqonun modernləşdirmə planlarında yer alan proqram eyni zamanda köhnələn KC-135 “Stratotanker” parkının mərhələli şəkildə istismardan çıxarılması prosesinin mühüm hissəsi hesab olunur.
ABŞ Hərbi Hava Qüvvələrinin yaydığı FY2027 təyyarə tədarükü büdcə sənədlərinə görə, KC-46A proqramı strateji mobillik, paylanmış əməliyyat strukturu və qlobal qüvvə ötürülməsi konsepsiyalarının mərkəzində dayanır.
Bildirilir ki, KC-46A “Pegasus” döyüş təyyarələrinin, bombardmançıların və kəşfiyyat platformalarının əməliyyat radiusunu ciddi şəkildə artırır və xüsusilə Sakit okean kimi geniş əməliyyat məkanlarında irəli bazalardan asılılığı azaldır.
ABŞ Hərbi Hava Qüvvələrinin qiymətləndirməsinə görə, havada yanacaq doldurma qabiliyyəti gələcəkdə Çinlə mümkün yüksək intensivlikli münaqişə ssenarilərində həlledici rol oynaya bilər.
“Boeing 767-2C” kommersiya platforması əsasında hazırlanan KC-46A “Pegasus” aşağıdakı xüsusiyyətlərlə təchiz edilir:
“Boom” tipli yanacaq doldurma sistemi
“Hose-and-drogue” yanacaq doldurma sistemi
Qabaqcıl müdafiə sistemləri
Təhlükəsiz rabitə infrastrukturu
Yük və tibbi təxliyə imkanları
Qeyd olunur ki, ABŞ Hərbi Hava Qüvvələrinin inventarındakı KC-135 “Stratotanker” tanker təyyarələrinin əksəriyyəti 60 ildən artıqdır xidmətdədir. Artan texniki xidmət xərcləri və struktur yorğunluğu problemləri yeni tanker təyyarələrinə ehtiyacı sürətləndirir.
ABŞ Hərbi Hava Qüvvələri tanker təyyarələrini yalnız dəstək platforması deyil, birbaşa strateji çəkindirmə elementi kimi qiymətləndirir.
Yayımlanan qiymətləndirmədə “Havada yanacaq doldurma qabiliyyəti hava üstünlüyünün qorunması, uzaqmənzilli bombardman missiyaları və qlobal qüvvə ötürülməsi baxımından kritik əhəmiyyət daşıyır” ifadələrinə yer verilib.
Bundan əlavə, tanker təyyarələrinin:
Davamlı hava patrulları
Uzaqmənzilli bombardman tapşırıqları
Havadan komanda-idarəetmə əməliyyatları
Sürətli qüvvə ötürülməsi
Koalisiya hava əməliyyatları kimi missiyalarda əsas rol oynadığı qeyd edilib.
KC-46A “Pegasus”un yalnız yanacaq doldurma tapşırıqları üçün deyil, həmçinin:
Şəxsi heyətin daşınması
Yük transferi
Tibbi təxliyə əməliyyatları
Humanitar yardım missiyaları üçün də istifadə oluna bildiyi bildirilib.
Platformanın bu xüsusiyyəti ilə ABŞ Hərbi Hava Qüvvələrinin “Agile Combat Employment” konsepsiyasına töhfə verdiyi və paylanmış qüvvə strukturuna uyğun hərəkət qabiliyyəti təqdim etdiyi vurğulanıb.
KC-46A proqramının ən mühüm modernləşdirmə istiqamətlərindən birini isə “Remote Vision System 2.0” sistemi təşkil edir.
İlk nəsil görüntü sistemində yaşanan dərinlik qavrayışı və yanacaq doldurma hizalanması problemlərinə görə “Boeing” ilə ABŞ Hərbi Hava Qüvvələrinin yeni nəsil sistem üzərində işlədiyi, yenilənmiş konfiqurasiyanın daha dəqiq yanacaq doldurma və tam əməliyyat sertifikasiyası təmin etməsinin hədəfləndiyi qeyd olunub.
Sevinc Əliyeva
Ordu.az
