Ordu.az xəbər verir ki, imzalanan razılaşmalar çərçivəsində parkın baxım və istismar fəaliyyəti uzadılacaq, həmçinin bütün təyyarələri əhatə edən genişmiqyaslı avionik modernizasiya proqramı həyata keçiriləcək.
Təxminən 462 milyon dollar dəyərində olan ilk paket Kanada Kral Hərbi Hava Qüvvələrinin “C-130J” parkı üçün mövcud texniki və logistika dəstəyinin 2029-cu il iyununadək uzadılmasını nəzərdə tutur.
Razılaşma texniki dəstəyi, ehtiyat hissələrin təminatını, baxım infrastrukturunu və döyüşə hazırlıq səviyyəsinin qorunmasına yönəlmiş tədbirləri əhatə edir. Kanada hökuməti bildirir ki, baxım fəaliyyəti ölkə iqtisadiyyatına ildə təxminən 85 milyon dollar töhfə verəcək və yüzlərlə yüksək ixtisaslı iş yeri yaradacaq.
Təxminən 684 milyon dollar dəyərində olan ikinci müqavilə isə RCAF 105 adlanan geniş avionik və vəzifə sistemi modernizasiya paketini əhatə edir. Proqram çərçivəsində Kanada inventarındakı 17 ədəd C-130J “Hercules” təyyarəsinin hamısı yeni nəsil naviqasiya, rabitə, uçuş idarəetmə və avionik sistemlərlə yenilənəcək.
Modernizasiya nəticəsində platformaların həm mülki, həm də hərbi hava məkanı standartlarına uyğun şəkildə uzun illər xidmət göstərməsi hədəflənir. Bununla da Kanadanın “Hercules” parkı NATO müttəfiqləri ilə birgə əməliyyatlarda iştirakını davam etdirə biləcək.
C-130J “Hercules” təyyarələri şəxsi heyətin, sursatın, nəqliyyat vasitələrinin və logistika yüklərinin daşınmasında Kanada Silahlı Qüvvələrinin ən vacib platformalarından biri sayılır.
Kanadanın Arktika bölgəsindəki təchizat əməliyyatlarından NATO tapşırıqlarına, humanitar yardımdan ölkədaxili fövqəladə vəziyyətlərə müdaxiləyə qədər geniş spektrdə istifadə edilən platformalar ölkənin strateji hava daşımaları qabiliyyətinin əsas elementləridir.
Kanada mövcud 17 təyyarəlik C-130J parkını 2007-ci ilin dekabrında imzalanmış təxminən 1,44 milyard dollarlıq müqavilə ilə əldə etmişdi.
Sevinc Əliyeva
Ordu.az
