Ordu.az xəbər verir ki, Pit Heqset bu büdcəni “ABŞ-nin milli təhlükəsizliyi üçün nəsillər boyu təsiri davam edəcək başlanğıc investisiyası” kimi qiymətləndirib.
ABŞ Konqresinin təsdiqinə təqdim olunacaq büdcə təklifinə yeni nəsil hava platformaları, hipersəs silahları, raketdən müdafiə sistemləri, gəmiqayırma proqramları, süni zəka və kosmik texnologiyalar üzrə genişmiqyaslı investisiyalar daxildir.
Büdcədə yeni müdafiə qabiliyyətlərinin inkişafı üçün ümumilikdə 756 milyard dollar ayrılması nəzərdə tutulur.
Əsas istiqamətlər arasında hava gücünün modernləşdirilməsi üçün 100 milyard dollar, “Golden Dome” raketdən müdafiə təşəbbüsü üçün 18 milyard dollar, gəmiqayırma sənayesi üçün 10 milyard dollar, süni zəka investisiyalarında 800 faiz artım, pilotsuz uçuş aparatları və kosmik proqramlar üçün rekord səviyyədə vəsait və kritik faydalı qazıntı təchizat zəncirlərinin ABŞ-yə daşınmasına yönəlmiş sərmayələr yer alır.
“Golden Dome” ABŞ ərazisini ballistik, qanadlı və hipersəs raketlərindən qorumağı hədəfləyən çoxqatlı raketdən müdafiə arxitekturası kimi hazırlanır. Proqram İsrailin “Iron Dome” sisteminə bənzədilsə də, qitə miqyasında geniş müdafiə infrastrukturu yaratmağı qarşıya məqsəd qoyur.
Büdcədə süni zəka xərclərinin mövcud səviyyə ilə müqayisədə 800 faiz artırılması planlaşdırılır. Bu artımın avtonom sistemlər, qərar dəstək mexanizmləri, hədəfləmə prosesləri və logistika planlaması kimi sahələrdə yeni qabiliyyətlər qazandırması nəzərdə tutulur.
Pilotsuz uçuş aparatları və kosmik proqramlar üçün ayrılan vəsaitin də ABŞ tarixinin ən yüksək səviyyələrindən biri olduğu bildirilir. ABŞ gəmiqayırma zavodlarının istehsal gücünü artırmaq məqsədilə əlavə 10 milyard dollarlıq sərmayə planlaşdırılır.
Heqset bildirib ki, bu vəsait 1962-ci ildən etibarən gəmiqayırma sahəsinə ayrılan ən böyük büdcələrdən biridir. Büdcədə nadir torpaq elementləri və digər kritik mineralların ABŞ daxilində istehsalının inkişaf etdirilməsinə yönəlmiş investisiyalar da yer alır.
Bu addım xüsusilə Çindən asılı olan təchizat zəncirlərinin azaldılmasına xidmət edir. 1,5 trilyon dollarlıq müdafiə büdcəsinin qüvvəyə minməsi üçün ABŞ Konqresinin təsdiqi tələb olunur.
Təklif qəbul edilərsə, ABŞ-nin müdafiə sənayesi istehsal gücü, texnoloji modernləşdirmə proqramları və uzunmüddətli hərbi qabiliyyətlərinin əhəmiyyətli dərəcədə sürətlənəcəyi gözlənilir.
Sevinc Əliyeva
Ordu.az
