Ordu.az xəbər verir ki, bu barədə xarici KİV-lər məlumat yayıb.

Şirkətin yaydığı məlumata görə, təhvil prosesi 2028-ci ilə qədər davam edəcək.

Sifariş “Elbit Systems”in 2023-cü ildə qazandığı əsas müqavilə çərçivəsində həyata keçiriləcək.

“Elbit Systems” bu sifarişdə yeganə əsas podratçı kimi fəaliyyət göstərəcək.

ABŞ Ordusu daha əvvəl ENVG-B istehsalını bir neçə şirkət arasında bölüşdürdüyü halda, bu dəfə sifarişin yalnız bir şirkətə verilməsi “Elbit”in məhsul performansına və istehsal qabiliyyətinə duyulan etimadın göstəricisi kimi qiymətləndirilir.

“Elbit Systems”in prezidenti və baş icraçı direktoru Bezhalel Maçlis bildirib:

“2023-cü ildə başladılan proqram çərçivəsində sifarişlərin davam etməsi sistemlərimizin performansına duyulan etimadın güclü göstəricisidir”.

“Enhanced Night Vision Goggle-Binocular” (ENVG-B) görüntü gücləndirmə və termal görüntüləmə texnologiyalarını vahid sistemdə birləşdirir.

Bu sayədə hərbçilər:

- zəif işıq şəraitində ətrafı aydın şəkildə görə bilir,
- tam qaranlıqda, tüstü və duman kimi maneələrdə hədəf aşkarlaya bilir,
- vahid görüntü üzərindən hər iki texnologiyanın üstünlüklərindən faydalana bilir.

ENVG-B əvvəlki nəsil tək gözlü sistemlərdən fərqli olaraq ikigözlü dizaynı sayəsində istifadəçilərə təbii görüntü və dərinlik hissi qazandırır.

Bu xüsusiyyət xüsusilə gecə əməliyyatlarında hərəkət, hədəf aşkarlanması və nişanalma zamanı hərbçilərin idrak yükünü azaldır.

ENVG-B yalnız gecəgörmə sistemi deyil, eyni zamanda şəbəkə bağlantılı döyüş məlumatlılığı platforması kimi də fəaliyyət göstərir.

Sistem:

- hədəf məlumatlarını,
- dost bölmələrin mövqelərini,
- naviqasiya məlumatlarını,
- tapşırıq işarələmələrini birbaşa hərbçinin baxış sahəsinə əks etdirə bilir.

Bundan əlavə, passiv nişanalma qabiliyyəti sayəsində lazer işarələyicisindən istifadə etmədən hədəfə nişanalma həyata keçirməyə imkan yaradır.

Bu xüsusiyyət düşmənin gecəgörmə sistemləri tərəfindən aşkarlanma riskini azaldır.

Sevinc Əliyeva
Ordu.az