Ordu.az xəbər verir ki, ABŞ dövlət katibi Romada səfərdədir və bu səfər Donald Trampın Roma Papası XIV Leoya yönəltdiyi çoxsaylı tənqidlərdən sonra gərginliyi azaltmaq cəhdi kimi qiymətləndirilir.

“Müqəddəs Taxt-Tac” ilə Vaşinqton arasında münasibətlərdə görünməmiş gərginlik fonunda Roma Papası cümə axşamı Apostol Sarayında Rubionu qəbul edib. Daha sonra Rubio Vatikan nümayəndələri ilə bir sıra görüşlər keçirib.

Vatikanın yayımladığı videoda Şimali Amerikadan olan ilk papanın qonağının əlini sıxdığı və ona rəsmi şəkildə “cənab dövlət katibi” deyə müraciət etdiyi görünür. Katolik olan Rubio isə cavabında “Sizi görməyə şadam” deyib.

Rubio Roma Papasına Amerika futboluna aid kiçik kristal top hədiyyə edib.

O zarafatla bildirib ki, Leonun Çikaqo sakini və “White Sox” komandasının məşhur azarkeşi olduğu üçün daha çox “beysbol həvəskarı” olduğunu bilir.

Roma Papası ilə 45 dəqiqə davam edən təkbətək görüşdən sonra Rubio Vatikanın dövlət katibi və faktiki diplomatik idarəsinin rəhbəri Pyetro Parolin ilə də görüşüb. Parolin səfərdən əvvəl papanı qətiyyətlə müdafiə etmiş və Trampın son hücumlarını “kifayət qədər qəribə” adlandırmışdı.

Vatikan yaydığı bəyanatda bildirib ki, tərəflər cari hadisələr ətrafında fikir mübadiləsi aparıblar və “müharibədən, siyasi gərginlikdən və mürəkkəb humanitar vəziyyətdən əziyyət çəkən ölkələrə, eləcə də sülh naminə yorulmadan çalışmaq zərurətinə xüsusi diqqət yetirilib”.

Sevinc Əliyeva
Ordu.az