Ordu.az xəbər verir ki, sözügedən müqavilə Türkiyə Quru Qoşunları Komandanlığının ehtiyacları istiqamətində kəşfiyyat, müşahidə, kəşfiyyat və hücum tapşırıqlarında istifadə olunmaq üçün 24 ədəd yeni nəsil “Bayraktar” TB2T-AI pilotsuz uçuş aparatının tədarükünü əhatə edir.
Türkiyə MSK sədri professor doktor Haluk Görgün açıqlamasında bildirib ki, TB2T-AI pilotsuz uçuş aparatı qabaqcıl süni zəka infrastrukturu, dəyişən qanad quruluşu və daha çox faydalı yükdaşıma qabiliyyəti ilə TB2 ailəsinin sahədən gələn ehtiyaclara uyğun inkişaf edən yeni mərhələsini təmsil edir. O, bu sistemin təhlükəsizlik qüvvələrinin sahədə daha geniş tapşırıq spektrində daha effektiv fəaliyyət göstərməsinə töhfə verəcəyini vurğulayıb.
Süni zəka ilə gücləndirilən zərbə tipli pilotsuz uçuş aparatı: “Bayraktar” TB2T-AI
“Baykar” tərəfindən milli və orijinal şəkildə hazırlanan Türkiyənin ilk zərbə tipli pilotsuz uçuş aparatı “Bayraktar” TB2 turbo mühərrik və qabaqcıl süni zəka sistemləri ilə təchiz edilən yeni versiyası ilə döyüş meydanında inqilabi dəyişiklik yaradacaq. Yeni nəsil “Bayraktar” TB2T-AI zərbə tipli pilotsuz uçuş aparatı turbo mühərrik gücü, yüksək sürət, üstün hündürlük və ağıllı uçuş qabiliyyətləri ilə öz sinfinə məxsus dünyadakı ən yaxşı sistem kimi fəaliyyət göstərməyə davam edəcək.
Turbo mühərrikə malik “Bayraktar” TB2T-AI 30.000 futdan yuxarı hündürlüyə 30 dəqiqədən daha qısa müddətdə qalxa bilir. Turbo mühərrik və qabaqcıl süni zəka sistemləri ilə təchiz edilən milli zərbə tipli pilotsuz uçuş aparatı 2025-ci il mayın ayında Keşanda keçirilən sınaq uçuşunda 37.096 fut hündürlüyə çataraq öz rekordunu yeniləmişdi.
Mövcud zərbə tipli pilotsuz uçuş aparatları ilə müqayisədə daha sürətli yüksəlmə və uzun müddət yüksək hündürlükdə qalma qabiliyyətinə malik “Bayraktar” TB2T-AI 160 düyün (300 km/saat) sürətlə hava üstünlüyünü əlində saxlayacaq böyük güc qazanıb. Artırılmış qalxma çəkisi və faydalı yük potensialı ilə döyüş meydanında daha uzun müddət və daha effektiv fəaliyyət göstərəcək.
“Bayraktar” TB2T-AI zərbə tipli pilotsuz uçuş aparatına inteqrasiya edilən yeni nəsil üç ədəd süni zəka kompüteri hava döyüşündə üstün avtonom qabiliyyətlər təqdim edir. Yeni nəsil milli zərbə tipli pilotsuz uçuş aparatı ən çətin radioelektron mübarizə mühitlərində relyef əsaslı vizual naviqasiya qabiliyyəti də qazanıb. Qabaqcıl süni zəka sistemləri sayəsində vizual naviqasiya ilə relyefi tanıyır və istiqaməti müəyyən edə bilir. Hədəfləri analiz edərək aşkarlama və tanıma həyata keçirə bilir. Vizual olaraq uçuş-enmə zolaqlarını tanıyaraq avtonom eniş və qalxış həyata keçirə bilir. Dinamik marşrut planlaması edərək ən uyğun uçuş marşrutlarını müəyyənləşdirə bilir.
“Bayraktar” TB2T-AI zərbə tipli pilotsuz uçuş aparatı döyüş meydanında oyunun qaydalarını dəyişən element olacaq. Milli zərbə tipli pilotsuz uçuş aparatı hər cür çətin şəraitin öhdəsindən gələ biləcək qabiliyyətlə uçur. Göydə yaranan fövqəladə hallarda süni zəka dəstəkli sistemləri sayəsində avtomatik şəkildə təhlükəsiz formada bazaya geri qayıda bilir. “Bayraktar” TB2T-AI bu xüsusiyyəti ilə döyüş meydanında dayanıqlılığı və əməliyyat təhlükəsizliyini ən yüksək səviyyəyə çatdırır.
Sevinc Əliyeva
Ordu.az
