Ordu.az xəbər verir ki, Türkiyə və Avropanın ən böyük müdafiə, aviasiya və kosmik sənaye klasteri olan “SAHA İstanbul”un təşkilatçılığı ilə İstanbul Sərgi Mərkəzində keçirilən SAHA 2026 Beynəlxalq Müdafiə, Aviasiya və Kosmik Sənaye Sərgisi davam edir.

“Anadolu” Agentliyinin qlobal kommunikasiya tərəfdaşı olduğu sərgidə milli imkanlarla hazırlanan yerli və çoxməqsədli insansız quru platforması GÖKBÖRÜ təqdim olunub. Saatda 30 kilometr sürətə çata bilən GÖKBÖRÜ 800 kiloqram daşıma qabiliyyətinə malikdir.

70 faiz dik yamacda və 45 faiz yan yamacda fəaliyyət göstərə bilən GÖKBÖRÜ ön, arxa, sağ və sol müstəqil təkər qrupları sayəsində çətin relyef şəraitində yüksək hərəkət qabiliyyəti təqdim edir.

Hətta enişli-yoxuşlu və qeyri-sabit ərazilərdə belə yük bölməsini sabit saxlaya bilən sistem müxtəlif əməliyyat ehtiyaclarına effektiv həllər təqdim edir.

“Elektroland Defence” baş direktoru Ferhat Uğur AA müxbirinə verdiyi açıqlamada Türkiyə müdafiə sənayesi sektorunun digər sektorlarla inteqrasiya olunmuş şəkildə işləyə bildiyini bildirib.

Uğur belə danışıb: “Bizim məqsədimiz effektiv, istehsal xərcləri aşağı və çoxistifadəliyə xitab edə bilən, çoxfunksiyalı sistemlər istehsal etməkdir. Bu gün təqdimatını etdiyimiz GÖKBÖRÜ belə bir sistemdir. Müdafiə Sənayesi Komitəsinin təsiri ilə inkişaf edən sektorun artıq mülki sahələrə də yönəlməsi lazım olduğunu düşünürük. Çünki müdafiə etməli olduğumuz o qədər çox şey var ki, meşələrimiz var, sahillərimiz var, kənd təsərrüfatı torpaqlarımız var. Buna görə də burada əldə etdiyimiz təcrübə və biliklə digər sektorları da əhatə edəcək şəkildə səmərəli xərcli robotlar istehsal etmək istəyirik”.

GÖKBÖRÜ hər cür relyefdə fəaliyyət göstərə biləcək quruluşa malikdir

Uğur bu gün NASA-nın Marsa göndərdiyi robot sisteminin mövcud olduğunu qeyd edərək bildirib: “O robot sistemindəki üstün və mənfi cəhətlərin hamısını qiymətləndirdik. Eyni mexanizm quruluşu ilə, amma üzərinə öz patentimiz olan məhsulumuzu da əlavə edərək onu daha funksional vəziyyətə gətirdik və ölkənin coğrafi şərtlərinə, dağa, palçığa, səhraya, meşəyə, hər mühitə gedə biləcək quruluşa çevirdik”.

GÖKBÖRÜ 6×6 insansız quru platformasının xərc baxımından səmərəli olduğunu bildirən Uğur qeyd edib: “Bu gün kənd təsərrüfatı sahəsində istifadə olunacaq bir vasitənin qiymətindən də ucuz qiymətə əldə edə bilərsiniz. Üzərində yük daşıya bilərsiniz. Bunu çoxməqsədli yükdaşıma platforması kimi təsəvvür edə bilərsiniz. İstəsəniz müdafiə sahəsində, istəsəniz kənd təsərrüfatı sahəsində, istəsəniz axtarış-xilasetmə qrupunda, hər yerdə fəaliyyət göstərə biləcək şəkildə hazırlanır”.

Uğur sistemin zərər alsa belə sürətlə təmir edilərək yenidən sahəyə qaytarıla bildiyini, bunun da proqram təminatı, avadanlıq, elektronika və mexanikanın bütün sistemlərinin yerli imkanlarla hazırlanmasından qaynaqlandığını, bu yanaşmanın əməliyyat davamlılığı və xarici asılılığın azaldılması baxımından kritik olduğunu qeyd edib.

Uğur GÖKBÖRÜ-yə xaricdən də tələbat olduğunu deyərək sözlərini belə davam etdirib:

“Bu sərginin ən böyük xüsusiyyətlərindən biri də bu oldu. Yaxın ölkələrdən birinə, amma Avropa tərəfdəki ölkələrdən biri ilə 30 ədədlik razılaşma mərhələsinə gəldik. Bu sərgidə bizi tapdılar. Onların da belə bir axtarışı var imiş. Xərc baxımından səmərəli, çoxistifadəyə yönəlmiş və istənilən şəkildə uyğunlaşdırıla bilən bir sistem axtarırdılar və araşdıranda, gəlib sınaqlarını görəndə bunun bununla həll olunduğuna inandılar. İndi sifariş gözləyirik. Bu sifariş şirkətimiz üçün deyil, bu ölkə üçündür. Çünki xaricə nə qədər ixrac etsək, ölkəmizə nə qədər pul gətirə bilsək, texnologiyanı nə qədər inkişaf etdirə bilsək, insan resurslarımızı nə qədər düzgün yönləndirə bilsək, hava platformalarındakı uğur quru platformalarında da olacaq”.

“Biz quru yönümlü millətik, qaranı biz bilirik”

Uğur dünyada konsepsiyanın dəyişdiyini, quru platformalarının modernləşdiyini və insansız sistemlərin ön plana çıxdığını, quru platformaları sahəsində Türkiyənin dünyanın ən qabaqcıl ölkəsi olduğunu bildirib.

Quru Platformaları İdarəsi və ordunun buna çox böyük önəm verdiyini deyən Uğur bildirib: “Bu günə qədər etdiyimiz sınaqlarda biz bunu sahədə sınamaq istəyirik dediyimiz zaman heç bir çətinlik yaşamırıq. “Rəy istəyirik” dediyimiz zaman bütün təcrübələrini bölüşən təcrübəli təhlükəsizlik qüvvəmiz var. “Bu belə olsa, bu daha yaxşı olar” kimi oradan fikir əldə edə bilirik”.

Uğur laboratoriyaya qapanıb 4 alim, 5 mühəndislə robot istehsal etmədiklərini, istehsalı türk milləti, ordu və polis ilə birlikdə həyata keçirdiklərini vurğulayıb: “Ona görə də dünyanın ən yaxşısı budur. Bundan daha yaxşısı olacaqmı? Olacaq. Yenə bir türk şirkəti edəcək. Bəlkə biz edəcəyik, bəlkə başqa bir türk şirkəti edəcək. Ən yaxşısı da yenə belə olacaq. Başqa cür onsuz da olmaz. Çünki biz quru yönümlü millətik, qaranı biz bilirik”.


Sevinc Əliyeva
Ordu.az