Ordu.az xəbər verir ki, Türkiyə və Avropanın ən böyük müdafiə, aviasiya və kosmik sənaye klasteri olan “SAHA İstanbul”un təşkilatçılığı ilə İstanbul Sərgi Mərkəzində SAHA 2026 Beynəlxalq Müdafiə, Aviasiya və Kosmik Sənaye Sərgisi keçirilir.

“Anadolu” Agentliyinin qlobal kommunikasiya tərəfdaşı olduğu sərgidə TSKGV nəzdində fəaliyyət göstərən ASELSAN, TUSAŞ, ROKETSAN və HAVELSAN şirkətlərinin tekstildən aksessuarlara qədər müxtəlif lisenziyalı məhsullarını əhatə edən “Vakıf Mağaza”nı istifadəyə verib.

TSKGV baş direktoru Bilal Topçu AA müxbirinə verdiyi açıqlamada SAHA və beynəlxalq müdafiə sənayesi sərgisi İDEF-in Türkiyə müdafiə sənayesinin bu günə qədər gəlib çatdığı nöqtəni nümayiş etdirdikləri ən yaxşı platformalardan biri olduğunu bildirib.

Topçu bu il də “Vakıf Mağaza”nı sərgidə açdıqlarını qeyd edərək bildirib: “Əslində bundan əvvəl İDEF-də də bu mağazanı açmışdıq. Hər şey 2024-cü ildə bir mədəniyyətin formalaşdırılması ideyası ilə başladı. Müdafiə sənayesindəki yolçuluğumuz əslində millətimizin böyük sahib çıxdığı bir yolçuluqdur”.

Topçu TSKGV və fond çətiri altında fəaliyyət göstərən ASELSAN, TUSAŞ, ROKETSAN, HAVELSAN, İŞBİR və ASPİLSAN şirkətlərinin hamısının xalqın ianələri ilə qurulduğunu xatırladıb.

Kipr Sülh Hərəkatı dövründə yaşanan çətinliklərin və embarqoların vətəndaşları böyük ianələr etməyə, “öz təyyarəni özün istehsal et”, “öz gəmini özün istehsal et” kimi kampaniyalara yönəltdiyini bildirən Topçu deyib: “Bu ianələrlə bu şirkətlər və bu fond quruldu. Millətimizlə müdafiə sənayemiz və ordumuz arasında çox güclü bağ var. Biz də Türkiyə Silahlı Qüvvələri ilə millətimiz arasında bu könül körpüsünü quran və davam etdirən fond kimi fəaliyyət göstəririk”.

“Türk millətinin də qürur duyduğunu bilirik”

Topçu Türkiyə müdafiə sənayesi məhsullarının son dövrdə vətəndaşların da diqqətini çəkməyə başladığını bildirərək, bu məhsulların yalnız Türkiyədə deyil, dünyada da özünü təsdiqlədiyini qeyd edib.

Bu məhsulların yalnız Türkiyənin döyüş gücünü və müdafiə potensialını artıran məhsullar olmaqdan əlavə, çox ciddi texnoloji dərinlik tələb edən məhsullar olduğuna diqqət çəkən Topçu sözlərinə belə davam edib:

“Beşinci nəsil döyüş təyyarəsinin adı nədir? deyə soruşsaq, bu gün küçədə hər kəs KAAN deyə bilir. HÜRJET-in adını hər kəs bilir. Hətta müdafiə sənayesində kiçik pilotsuz uçuş aparatlarından raketlərə qədər hamısına gözəl və türk adları verilir. Müdafiə Sənayesi Komitəsi bunu çox yaxından izləyir. Çox gözəl ekosistem var. Biz də məhz bu mədəniyyətin davam etməsi üçün bu ideya ilə ortaya çıxmışdıq. Fond şirkətlərimizin lisenziyalı məhsullarını “Vakıf Mağaza” çətiri altında satmaq. Biz bunu xəyal etmişdik və bu, gerçəyə çevrildi”.

Topçu “Vakıf Mağaza”nı ilk dəfə İDEF 2025-də açdıqlarını xatırladaraq, daha sonra TEKNOFEST İstanbul çərçivəsində yenidən 350 kvadratmetrlik böyük mağaza açdıqlarını bildirib.

“Vakıf Mağaza”ya vətəndaş marağının çox yüksək olduğunu vurğulayan Topçu qeyd edib: “Həqiqətən də istəyirdik ki, gənclərimiz və uşaqlarımız xarici ölkələrin xarici personajları ilə deyil, türk mühəndislərinin, qardaşlarının, bacılarının hazırladığı çox gözəl məhsullar və markalarla gəzsinlər, Türkiyə müdafiə sənayesi ilə fəxr etsinlər və bu hekayənin bir hissəsi olsunlar”.

Sərginin ilk günündə 1000 nəfəri qəbul etdiklərini və 2 mindən çox məhsul satıldığını bildirən Topçu sərgi boyu müvəqqəti mağazada xidmət göstərməyə davam edəcəklərini deyib.

Mağazaya onlayn şəkildə hər zaman daxil olmağın mümkün olduğunu qeyd edən Topçu sözlərini belə davam etdirib:

“Buradan həm zövqlə geyinə biləcəkləri məhsullar alacaqlar, həm də bunun vasitəsilə fondumuza və müdafiə sənayesinə töhfə vermiş olacaqlar. Satdığımız hər məhsulun etiketində bu mesajı izah edən cümlələrimiz var. Burada edilən alış-veriş çox müqəddəs alış-verişdir. Müharibələri bəlkə dayandıra bilmirik, dünyada pis atmosfer var, amma ən azı od Türkiyəyə düşməsin və təhlükəsiz tərəfdə qala bilək deyə çəkindirmə potensialımızı artırmaq məqsədilə silah sistemlərimizi və müdafiə sistemlərimizi inkişaf etdirən ASELSAN, ROKETSAN, TUSAŞ, HAVELSAN var. Biz bunlarla fəxr edirik. Türk millətinin də qürur duyduğunu bilirik. Bu qüruru birlikdə “Vakıf Mağaza”mızda paylaşmağa davam edəcəyik”.

“Məqsədimiz daha çox insana çatmaq və fondun mesajını daha çox insana çatdırmaqdır”

Topçu onlayn satışlarda ən çox KAAN və ATAK helikopteri maketinin böyük maraq gördüyünü bildirib: “Bundan başqa tekstil məhsullarında həm ASELSAN, ROKETSAN, TUSAŞ, HAVELSAN markalı məhsullarımız var. Bəzilərində məhsula uyğun olaraq KAAN köynəklərimiz, ATAK helikopterli köynəklərimiz var. Dizaynerlərimiz çox gözəl dizaynlar hazırlayıb. Maraq əsasən maketlərə, daha sonra isə tekstil məhsullarına yönəlir. İnternet satışları əsasən maketlər üzərindədir, amma tekstildə uşaq və körpə geyimlərindən arxamızda gördüyünüz pilot gödəkçələrinə qədər geniş çeşid mövcuddur”.

Topçu “Vakıf Mağaza”nın bütün gəlirlərini fonda bağışlayan şirkət olduğunu vurğulayaraq, hər bir alış-verişin Türkiyə ordusuna dəstək kimi geri döndüyünü bildirib.

Faktiki olaraq üçüncü mağazalarını açdıqlarını qeyd edən Topçu bildirib: “Məqsədimiz daha çox insana çatmaq və fondun mesajını daha çox insana çatdırmaqdır. Yaxın günlərdə inşallah Etnospor Festivalında, Şanlıurfada TEKNOFEST mağazalarımızı açmağı düşünürük. Amma vətəndaşlarımız “Vakıf Mağaza”nın internet ünvanı vasitəsilə fondumuzun və fond şirkətlərimizin lisenziyalı məhsullarına hər zaman çata bilərlər”.


Sevinc Əliyeva
Ordu.az