Ordu.az xəbər verir ki, uzun mənzil, hibrid axtarış başlığı seçimləri və müxtəlif platformalara inteqrasiya qabiliyyəti ilə diqqət çəkən sistem müasir döyüş meydanında yüksək dəyərli hədəflərə qarşı hazırlanmış yeni nəsil zərbə vasitələrindən biri kimi ön plana çıxır.
ROKETSAN stendində nümayiş etdirilən CİDA “NLOS Anti-Tank Missile”, yəni görmə xəttindən kənar tank əleyhinə raket sistemi kimi təqdim olunur. Sistem tanklar, zirehli vasitələr, döyüş vasitələri, eləcə də sabit və hərəkətli hədəflərə qarşı istifadə olunmaq üçün hazırlanıb.
Uzun mənzil qabiliyyəti ilə diqqət çəkən CİDA quru platformalarından 35 kilometr, hava platformalarından isə 55 kilometr mənzilə çata bilir. Bu göstəricilər sistemi klassik tank əleyhinə raketlərdən fərqləndirərək dərin nişanalma missiyaları üçün uyğun edir.
Çoxsaylı axtarış başlığı arxitekturası
CİDA-nın ən diqqətçəkən xüsusiyyətlərindən biri müxtəlif missiya ehtiyaclarına uyğun formalaşdırıla bilən idarəetmə arxitekturasıdır. Sistem TV + IIR hibrid axtarış başlığı və ya RF məlumat bağlantısı, görüntüləyici infraqırmızı axtarış başlığı və RF məlumat bağlantısı və ya yarımaktiv lazer axtarış başlığı olmaqla üç fərqli idarəetmə konfiqurasiyası ilə təchiz olunub.
Bu quruluş sayəsində raketin müxtəlif radioelektron mübarizə şəraitində, hərəkətli hədəflərə qarşı və ya dəqiq zərbə missiyalarında istifadə oluna bilməsi hədəflənir.
RF datalink infrastrukturu isə operatora uçuş zamanı məlumat ötürülməsi və hədəf yenilənməsi qabiliyyəti təmin edən kritik elementlər sırasındadır.
Fərqli döyüş başlığı seçimləri
ROKETSAN tərəfindən hazırlanan sistem yalnız tank əleyhinə missiyalar deyil, müxtəlif hədəf növlərinə qarşı döyüş başlığı seçimləri ilə də diqqət çəkir.
CİDA üçün nümayiş etdirilən döyüş başlıqları arasında tandem tank əleyhinə, yüksək partlayış qabiliyyətli zərbə dalğalı və qəlpəli termobarik konfiqurasiyalar yer alıb.
Tandem döyüş başlığı xüsusilə müasir reaktiv zirehli tanklara qarşı effektivlik təmin etmək məqsədilə hazırlanıb. Termobarik və zərbə dalğalı seçimlər isə müxtəlif hədəf növlərinə qarşı missiya çevikliyi təqdim edir.
Quru, hava və dəniz platformalarına inteqrasiya
Sistem arxitekturasının modul quruluşu sayəsində CİDA-nın müxtəlif platformalara inteqrasiya edilə biləcəyi görünür.
Paylaşılan məlumatlara görə, raket fırlanan qanadlı hava platformaları, sabit qanadlı hava platformaları, taktiki təkərli və tırtıllı quru platformaları, eləcə də dəniz platformaları üzərindən istifadə oluna biləcək şəkildə hazırlanıb.
Təxminən 2 metr uzunluğa və konteyner xaric 65 kiloqram çəkiyə malik olan sistem xüsusilə uzaqmənzilli dəqiq hücum missiyaları üçün hazırlanmış yeni nəsil ağıllı sursat konsepsiyaları arasında yer alır.
Sevinc Əliyeva
Ordu.az
