Ordu.az xəbər verir ki, şirkətin daha əvvəl hazırladığı tırtıllı İQP ailəsindən sonra təqdim edilən yeni platforma yüksək sürət, modul arxitektura və xərc baxımından effektiv quruluşu ilə diqqət çəkib.
Tamamilə şirkətin öz resursları hesabına hazırlanan sistem müasir döyüş meydanının sürət, çeviklik və seriyalı istehsal ehtiyaclarına cavab verəcək şəkildə hazırlanıb. Təqdim olunan platformanın kamikadze pilotsuz uçuş aparatı inteqrasiyası, logistik missiyalar, kəşfiyyat-müşahidə və müxtəlif silah sistemləri ilə çoxməqsədli istifadə imkanı təqdim etdiyi bildirilib.
Təqdimat tədbirində çıxış edən “Tekatron”un Baş direktoru Rıdvan Özdemir bildirib ki, şirkət daha əvvəl dörd fərqli tırtıllı İQP hazırlayıb və yeni platforma “Tekatron” üçün mühüm mərhələdir.
Özdemir ilk dəfə təkərli insansız quru platformasını istifadəçilərin xidmətinə təqdim etdiklərini bildirib: “Təkərli insansız quru platforması hekayəsi bizim üçün yeni başlayır. İlk olaraq 4×4 məhsulumuzu təqdim edirik. Bundan sonra isə 6×6 insansız quru vasitəsi ilə davam edəcəyik”.
Sahədən gələn rəylərlə hazırlanıb
“Tekatron” tərəfindən hazırlanan yeni nəsil platformanın dizayn prosesində birbaşa sahədən gələn ehtiyacların əsas rol oynadığı vurğulanıb.
Vasitə 55 km/s maksimum sürətə, 150 kilometr mənzilə, elektrik mühərriki infrastrukturuna və modul missiya arxitekturasına malik olacaq şəkildə hazırlanıb.
Platformanın eyni gövdə üzərindən fərqli missiya konfiqurasiyalarına uyğunlaşdırıla bildiyi bildirilib. Sərgidə nümayiş etdirilən versiyada kamikadze pilotsuz uçuş aparatı inteqrasiyası və silah sistemi yer alarkən, eyni platformanın logistika, kəşfiyyat-müşahidə və digər sahə missiyaları üçün də konfiqurasiya oluna bildiyi qeyd edilib.
Modul arxitektura və seriyalı istehsal vurğusu
Rıdvan Özdemir bildirib ki, platformanın ən kritik imkanlarından biri miqyaslana bilməsidir. Müasir döyüş mühitində təhvil qrafiklərinin kritik hala gəldiyini deyən Özdemir platformanın sürətli seriyalı istehsal məntiqi ilə hazırlandığını bildirib.
“Tekatron”un xüsusilə yüksək saylı sifarişlərə qısa müddətdə cavab verə biləcək istehsal arxitekturası qurmağı hədəflədiyi qeyd olunub.
Xərc baxımından effektiv yanaşma
Yeni nəsil İQP konsepsiyasının diqqət çəkən məqamlarından biri də xərc baxımından effektiv istifadə yanaşması olub.
“Tekatron”un Baş direktoru Özdemir müasir münaqişə mühitlərində aşağı xərcli, lakin yüksək əməliyyat töhfəsi verən sistemlərin ön plana çıxdığını bildirərək kamikadze pilotsuz uçuş aparatı inteqrasiyasına malik bu konsepsiyanın xüsusilə ön xətt missiyalarında effektiv istifadəsinin hədəfləndiyini deyib.
Özdemir sistemin sahədə itirilməsi halında belə istifadəçi üçün ciddi maliyyə yükü yaratmadan yüksək sayda istifadə imkanı təqdim edəcəyini bildirib.
Sevinc Əliyeva
Ordu.az
