Ordu.az xəbər verir ki, SAHA 2026 çərçivəsində keçirilən imza mərasimi ilə birlikdə Türkiyə Silahlı Qüvvələrinin inventarındakı mövcud quru və amfibiya platforma potensialının genişləndirilməsi hədəflənir.

İmzalanan müqavilənin PARS 6×6 və 8×8 əsaslı ÖMTTZA vasitələri ilə ZAHA platformalarını əhatə etdiyi bildirilib.

Əlavə ÖMTTZA təhvil-təslimatları davam edəcək

Yeni müqavilə çərçivəsində FNSS tərəfindən hazırlanmış PARS ailəsinə aid vasitələrin əlavə təhvil-təslimatı həyata keçiriləcək. Türkiyə Silahlı Qüvvələri üçün hazırlanmış ÖMTTZA vasitələri kəşfiyyat, komanda-idarəetmə, şəxsi heyətin daşınması və müxtəlif tapşırıq konsepsiyalarında istifadə oluna bilir.

PARS platformaları xüsusilə yüksək mina və ballistik mühafizə səviyyəsi, inkişaf etdirilmiş hərəkət qabiliyyəti və modul arxitekturası ilə seçilir. FNSS tərəfindən hazırlanmış 6×6 və 8×8 konfiqurasiyalar müxtəlif əməliyyat ehtiyaclarına uyğunlaşdırıla bilir.

Daha əvvəl başladılan ÖMTTZA Layihəsi çərçivəsində Türkiyə Silahlı Qüvvələrinə müxtəlif tapşırıq konfiqurasiyalarında təhvil-təslimatlar edilmişdi. Yeni müqavilə ilə birlikdə mövcud inventarın genişləndirilməsi və əməliyyat potensialının artırılması nəzərdə tutulur.

ZAHA proqramında yeni addım

Müqavilənin diqqət çəkən digər istiqamətini isə ZAHA təchizatı təşkil edib. FNSS tərəfindən Hərbi Dəniz Qüvvələri Komandanlığının ehtiyacları doğrultusunda hazırlanmış ZAHA Türkiyənin müasir amfibiya əməliyyat qabiliyyətinin əsas elementlərindən biri hesab olunur.

ZAHA şəxsi heyət daşıyıcısı, komanda-idarəetmə və xilasetmə kimi müxtəlif variantlarda fəaliyyət göstərə bilir. Başda TCG “Anadolu” olmaqla desant gəmilərindən dənizə enərək yüksək sürətlə sahilə çata bilən platforma amfibiya əməliyyatlarında kritik rol oynayır.

Türkiyə Silahlı Qüvvələrinin inventarındakı ən sürətli amfibiya zirehli vasitələrdən biri hesab olunan ZAHA dəniz və quru tapşırıqlarının tələblərini eyni platformada birləşdirir.

Sevinc Əliyeva
Ordu.az