Ordu.az xəbər verir ki, Türkiyə Müdafiə Sənayesi Komitəsinin rəhbəri Haluk Görgün təhvil həcmi ilə bağlı açıqlama verib.

20 ədəd KAAN inventara daxil olacaq

Haluk Görgün bildirib: “Bu gün imzaladığımız müqavilə çərçivəsində 2028-ci ildən başlayaraq 2030-cu ilin sonunadək Hərbi Hava Qüvvələri Komandanlığımıza 20 ədəd “Blok-10” KAAN təyyarəsini təhvil verməyi hədəfləyirik”.

Görgün eyni zamanda yerli mühərrikli KAAN ilə bağlı da açıqlama verib: “Yerli mühərrik inkişaf etdirmə yol xəritəmizə uyğun olaraq TF35000 mühərrikinin imkanlarının artırılması ilə Blok-30 KAAN platformalarına inteqrasiyasını da planlaşdırırıq”.

KAAN layihəsi çərçivəsində hazırlanan döyüş təyyarəsinin Türkiyə Hərbi Hava Qüvvələrinin inventarında yer alan və 2030-cu illərdən etibarən mərhələli şəkildə xidmətdən çıxarılması planlaşdırılan F-16 döyüş təyyarələrini əvəz etməsi nəzərdə tutulur.

KAAN-da hansı sursatlardan istifadə olunacaq?

Milli Döyüş Təyyarəsi KAAN-ın əməliyyat imkanlarını artırmaq məqsədilə həm daxili, həm də xarici asqı nöqtələrində istifadə ediləcək geniş çeşiddə sursat hazırlanır.

Bu çərçivədə təyyarədə HGK-82, HGK-83 və HGK-84 dəqiq tuşlama dəstləri, LGK-82 və LGK-84 lazer tuşlama dəstləri, KGK-82 və KGK-83 qanadlı tuşlama dəstləri, SOM ailəsinə məxsus qanadlı raketlər, Miniatür Bomba Sistemi, “Teber-82”, MK-82, MK-83 və MK-84 ümumi təyinatlı bombalar yer alır.

Bundan əlavə, hava üstünlüyü və xüsusi tapşırıqlar üçün yerli yaxın mənzilli (WVR) və uzaq mənzilli (BVR) “hava-hava” raketləri, 500 LB və 2000 LB nüfuzetmə qabiliyyətli bombalar, Anti-Radiyasiya Raketi (AKBABA) və qanadlı raketlər kimi qabaqcıl sursat sistemlərinin inteqrasiyası nəzərdə tutulur.

Sevinc Əliyeva
Ordu.az