Ordu.az xəbər verir ki, bu barədə Almaniyanın KNDS şirkəti məlumat yayıb.

Levanqer bələdiyyəsində seriyalı istehsalın 2026-cı ilin payızında başlaması planlaşdırılır.

Müəssisəyə lazer sınaq poliqonu, dik yamaclar və su hovuzu daxil olmaqla xüsusi sınaq yolları daxildir və onun illik istehsal gücü 36 tankadəkdir.

“RITEK tərəfdaşımızla birlikdə Norveç ordusuna “Leopard” 2A8NO tanklarını çatdırmaq üçün istehsal xəttini sürətlə qurduq. Bu, yalnız əsas müştəri müqaviləsinin icrasını təmin etmir, həm də “Levanqer” obyektinin istehsal imkanlarımızın genişləndirilməsi baxımından əhəmiyyətini göstərir”, - deyə KNDS “Deutschland” şirkətinin baş direktoru Florian Henvarter bildirib.

Cəmi 18 ay ərzində Norveç tank istehsalı və sınaqları üçün müasir inteqrasiya edilmiş müəssisə qurub.

Dayanıqlılıq prioritet hesab olunur. Müəssisə geotermal mənbələrdən əldə olunan enerji ilə işləyir və bu, ekoloji cəhətdən təmiz fəaliyyəti təmin edir.

Ümumilikdə Norveç ordusu üçün nəzərdə tutulan 54 ədəd “Leopard” 2A8NO əsas döyüş tankından 37-si burada istehsal olunacaq ki, bu da Avropanın müdafiə imkanlarını əhəmiyyətli dərəcədə gücləndirəcək.

Zavodun açılması ilə birlikdə ilk iki “Leopard” 2A8NO tankı artıq Norveç ordusuna təhvil verilib.

Bu versiyanın əvvəlki “Leopard” 2A6 və “Leopard” 2A7 variantlarından əsas fərqi İsrailin “Rafael” şirkəti tərəfindən hazırlanmış və istehsal edilən “Trophy” aktiv müdafiə sisteminin quraşdırılmasıdır.

2023-cü ildə Almaniyanın “Leopard 2” tankı Norveç tenderində Cənubi Koreyanın K2 “Black Panther” tankını geridə qoyaraq qalib gəlib.

Hər iki rəqib qiymətləndirmə sınaqları üçün Norveçə çatdırılmışdı. Müsabiqə Norveç Silahlı Qüvvələrindəki “Leopard” 2A4NO tanklarını əvəz etmək məqsədilə keçirilirdi.

Sevinc Əliyeva
Ordu.az